సగం సినిమా ఫిజియో బెడ్‌పైనే జరిగింది - షాక్‌కు గురిచేసిన రకుల్ వ్యాఖ్యలు!

దే దే ప్యార్ దే 2 చిత్రీకరణ సమయంలో తాను ఎదుర్కొన్న అత్యంత కష్టసాధ్యమైన దశ గురించి రకుల్ ప్రీత్ సింగ్ తాజాగా వెల్లడించింది. పండగ చేస్కో, సరైనోడు, ధ్రువ వంటి హిట్ చిత్రాల తర్వాత ఆమె బాలీవుడ్‌పై దృష్టి పెట్టింది. కానీ అక్కడ పరిస్థితులు ఆశించినట్లు లేకపోవడంతో, మేరే హజ్బండ్ కీ బీవీ వంటి కొన్ని చిత్రాలు పనిచేయకపోవడంతో, గత రెండు సంవత్సరాలు ఆమెకు చాలా కఠినంగా గడిచాయి. అయితే ఇప్పుడు దే దే ప్యార్ దే 2 మంచి ఓపెనింగ్‌తో మొదలై వారం పాటు స్టెడీగా కొనసాగడంతో రకుల్‌కు మళ్లీ బజ్ పెరిగింది. ఈ చిత్రం మొదటి వారం ముగిసే సరికి దాదాపు ₹51 కోట్లు నెట్ వసూళ్లు సాధించింది.

ఈ నేపథ్యంలో రకుల్ ఇచ్చిన ఒక ఇంటర్వ్యూ సోషల్ మీడియాలో వైరల్ అవుతోంది. ఇందులో ఆమె తొలిసారిగా షూటింగ్ మధ్యలో వచ్చిన తీవ్రమైన స్పైన్ ఇంజరీ గురించి చెప్పింది. సినిమా సగం పూర్తయిన సమయంలో గాయపడిన ఆమెకు 40 రోజుల పాటు బెడ్ రెస్ట్ తప్పలేదు. తిరిగి ఎప్పుడు సాధారణంగా నడవగలనో తెలియని పరిస్థితిలో మూడు నెలల పాటు షూటింగ్‌కు దూరంగా ఉండాల్సి వచ్చింది. సెట్స్‌కి తిరిగి వచ్చిన తర్వాత కూడా ఆమె కూర్చోవడం సాధ్యం కాలేదు. “సినిమా సగం ఫిజియో బెడ్‌పై పడుకొని చేశాను. స్క్రీన్‌పై మీరు ఏమీ గుర్తించలేరు,” అని చెప్పిన ఆమె మాటలు పలువురిని ఆశ్చర్యపరిచాయి.

అందరూ మాట్లాడుకుంటున్న హైవే సీన్ అయితే ఆమెకు అత్యంత కష్టమైన భాగం. అది ఎలా చేశారో చెబుతూ రకుల్, “నా బెడ్ నిజంగానే హైవేపైనే ఉండేది. నేను పడుకొని ఉండగా వాళ్లు సెటప్ రెడీ చేస్తారు. నేను లేచి షాట్ ఇస్తాను, మళ్లీ పడుకుంటాను,” అని వివరించింది. ఇప్పుడు ప్రేక్షకులు ఆమె నటనను ప్రశంసిస్తున్నప్పుడు, ఆ ప్రదర్శన వెనుక ఉన్న బాధ, సహనం, అంకితభావం ఎంత పెద్దదో కూడా గ్రహిస్తున్నారు.