‘డీసీ’ సక్సెస్ సెలబ్రేషన్స్‌- హీరోయిన్ను గుర్తించరా అని విమర్శలు

తమిళ సినిమా ‘డీసీ’ ఘన విజయం సాధించడంతో నిర్మాత కళానిధి మారన్ చిత్ర బృందంలోని కీలక సభ్యులకు ఖరీదైన కానుకలు అందించారు. సన్ పిక్చర్స్ బ్యానర్‌పై అరుణ్ మాథేశ్వరన్ దర్శకత్వంలో రూపొందిన ఈ సినిమా ఆగస్టు 7న విడుదలై, దాదాపు రూ.25 కోట్ల బడ్జెట్‌తో తెరకెక్కి ప్రపంచవ్యాప్తంగా రూ.100 కోట్లకు పైగా వసూళ్లు సాధించింది. విజయోత్సవంలో భాగంగా దర్శకుడు అరుణ్ మాథేశ్వరన్, హీరో లోకేష్ కనగరాజ్, సంగీత దర్శకుడు అనిరుధ్ రవిచందర్‌కు కొత్త బీఎండబ్ల్యూ కార్లను బహుమతిగా అందించారు.

అయితే సినిమాలో కీలక పాత్రల్లో నటించిన వామికా గబ్బి, సంజనా కృష్ణమూర్తికి ఎలాంటి కానుకలు ఇవ్వకపోవడంపై సోషల్ మీడియాలో చర్చ మొదలైంది. ముఖ్యంగా చంద్ర పాత్రలో వామికా గబ్బి నటనకు మంచి స్పందన రావడంతో ఆమెను కూడా విజయోత్సవంలో ప్రత్యేకంగా గుర్తించాల్సిందని అభిమానులు అభిప్రాయపడుతున్నారు. సినిమా విజయానికి హీరో, దర్శకుడు, సంగీత దర్శకుడితో పాటు నటీమణుల కృషి కూడా ఉందని పలువురు కామెంట్లు చేస్తున్నారు.

కొంతమంది నెటిజన్లు వామికాకు కనీసం స్కూటీ అయినా ఇవ్వాల్సిందని సరదాగా వ్యాఖ్యానించగా, మరికొందరు ఆమెకు బీఎండబ్ల్యూ ఇవ్వాల్సిందేనని అన్నారు. మహిళా నటుల కృషిని కూడా గుర్తించాల్సిన అవసరం ఉందని పలువురు అభిప్రాయపడ్డారు. లోకేష్ కనగరాజ్ హీరోగా నటించిన ఈ డార్క్ యాక్షన్ డ్రామాకు అరుణ్ మాథేశ్వరన్ దర్శకత్వం వహించగా, వామికా గబ్బి నటన, అనిరుధ్ సంగీతం ప్రధాన ఆకర్షణలుగా నిలిచాయి. ప్రస్తుతం ఈ సినిమా సన్ నెక్స్ట్‌లో స్ట్రీమింగ్ అవుతోంది.