ఔషధాల ధరల వ్యత్యాసంపై కేంద్రాన్ని ప్రశ్నించిన సుప్రీంకోర్టు

ఔషధాల గరిష్ఠ చిల్లర ధర (ఎంఆర్‌పీ), రిటైలర్లకు విక్రయించే ధర మధ్య భారీ వ్యత్యాసం ఉండటంపై సుప్రీంకోర్టు కేంద్ర ప్రభుత్వాన్ని ప్రశ్నించింది. జస్టిస్ విక్రమ్‌నాథ్, జస్టిస్ సందీప్ మెహతాలతో కూడిన ధర్మాసనం.. ఔషధాల ధరల వ్యవస్థ ఔషధ తయారీ సంస్థలకు అనుకూలంగా ఎందుకు పనిచేస్తోందని నిలదీసింది. ఫార్మా రంగంలోని మొత్తం వ్యవస్థను నియంత్రించకూడదనేది ప్రభుత్వ విధానమని కేంద్రం కోర్టుకు తెలిపింది.

దేశంలో మందుల ధరలకు సంబంధించిన రెండు పిటిషన్లపై విచారణ సందర్భంగా, నేషనల్ ఫార్మాస్యూటికల్ ప్రైసింగ్ అథారిటీ (ఎన్‌పీపీఏ) పనితీరుపైనా ధర్మాసనం అసంతృప్తి వ్యక్తం చేసింది. ఎంఆర్‌పీకి, రిటైలర్ల కొనుగోలు ధరకు మధ్య ఉన్న వ్యత్యాసాన్ని ప్రస్తావిస్తూ, ఈ పరిస్థితిని ప్రభుత్వం అనుమతిస్తోందా, నియంత్రణ లేకుండా ఇలాగే కొనసాగనివ్వాలా అని ప్రశ్నించింది. కేంద్రం తరఫున అదనపు సొలిసిటర్ జనరల్ ఐశ్వర్య భాటీ వాదనలు వినిపిస్తూ, భారత్‌లో ఔషధాల ధరలు ప్రపంచంలోనే అత్యంత తక్కువగా ఉన్నాయని తెలిపారు. ఇరుపక్షాల వాదనలు విన్న ధర్మాసనం తీర్పును రిజర్వ్ చేసింది.