కపుల్ ఫ్రెండ్లీతో సంతోష్ సోబన్‌కు మంచి బ్రేక్: ధీరజ్ మొగిలినేని

సంతోష్ సోబన్, మానసా వారణాసి ప్రధాన పాత్రల్లో నటించిన కపుల్ ఫ్రెండ్లీ యువతకే కాకుండా కుటుంబ ప్రేక్షకులను కూడా ఆకట్టుకునే సంగీతాత్మక ప్రేమకథా చిత్రమని డిస్ట్రిబ్యూటర్ ధీరజ్  మొగిలినేని తెలిపారు. యూవీ క్రియేషన్స్ సమర్పణలో యూవీ కాన్సెప్ట్స్ బ్యానర్‌పై తెరకెక్కిన ఈ చిత్రానికి అశ్విన్ చంద్రశేఖర్ దర్శకత్వం వహించగా, అజయ్ కుమార్ రాజు పి. సహ నిర్మాతగా ఉన్నారు. వాలెంటైన్స్ డే సందర్భంగా  ఈ నెల 14 న తెలుగు, తమిళ భాషల్లో విడుదలకు సిద్ధమైన ఈ సినిమా చెన్నై నేపథ్యంగా సాగుతుంది. లైవ్-ఇన్ కాన్సెప్ట్‌కు సంబంధించిన అంశం కేవలం కొద్ది నిమిషాలే ఉండగా, కథ మొత్తం ప్రేమ, పరస్పర సహకారం, భావోద్వేగాల చుట్టూ తిరుగుతుందని ఆయన చెప్పారు.

సంతోష్ సోబన్ నటన చాలా మెచ్యూర్డ్‌గా, సెటిల్డ్‌గా ఉందని ప్రశంసించిన ధీరజ్, ఈ సినిమా అతడికి మంచి బ్రేక్ ఇస్తుందని ఆశాభావం వ్యక్తం చేశారు. దర్శకుడు అశ్విన్ బలమైన స్క్రిప్ట్‌తో ప్రతి సీన్‌ను సహజంగా అనుసంధానించాడని తెలిపారు. చెన్నైలో షూటింగ్ చేయడం కష్టమైనా గెరిల్లా స్టైల్‌లో చిత్రీకరణ పూర్తి చేశామని వెల్లడించారు. వాలెంటైన్స్ డే రోజున ఇతర కొత్త సినిమాలు, రీ రిలీజ్‌లతో పోటీ ఉన్నప్పటికీ కపుల్ ఫ్రెండ్లీ తనకంటూ ప్రత్యేక ప్రేక్షకులను సంపాదిస్తుందనే నమ్మకం వ్యక్తం చేశారు. ప్రస్తుతం చెన్నై లవ్ స్టోరీ, సంగీత్ సోబన్ హీరోగా మరో చిత్రం, అలాగే పిల్లల కోసం ఓ వేసవి చిత్రం పనుల్లో ఉన్నట్లు తెలిపారు.