అల్లు అర్జున్‌ ‘రాకా’ విజువల్స్‌పై సిబి చక్రవర్తి ప్రశంసలు

భారతీయ సినిమా దృశ్య ప్రమాణాలు కొత్త స్థాయులకు చేరుతున్నాయని దర్శకుడు సిబి చక్రవర్తి అన్నారు. ఐకాన్‌ స్టార్‌ అల్లు అర్జున్‌, దీపికా పదుకొణె ప్రధాన పాత్రల్లో దర్శకుడు అట్లీ తెరకెక్కిస్తున్న సైన్స్‌ ఫిక్షన్‌ చిత్రం ‘రాకా’ విజువల్స్‌పై ఆయన స్పందించారు. ఈ సినిమా కోసం రూపొందించిన దృశ్యాలను చూసి తాను ఆశ్చర్యపోయానని, హాలీవుడ్‌ చిత్రం ‘అవతార్‌’తో పోల్చదగిన స్థాయిలో విజువల్‌ ఎఫెక్ట్స్‌ ఉన్నాయని సిబి చక్రవర్తి పేర్కొన్నట్లు సమాచారం.

భారతీయ సినిమాను అంతర్జాతీయ స్థాయికి తీసుకెళ్లడంలో ఎస్‌ఎస్‌ రాజమౌళి పోషించిన పాత్రను ప్రస్తావిస్తూ.. అట్లీ కూడా భారీ స్థాయిలో కొత్త విజువల్‌ ప్రమాణాలను నెలకొల్పుతున్నారని సిబి చక్రవర్తి ప్రశంసించారు. భారత్‌లోనే ఇలాంటి భారీ స్థాయి దృశ్య ప్రభావాలు రూపొందడం గర్వించదగ్గ విషయమని అన్నారు. అట్లీ దర్శకత్వంలో, అల్లు అర్జున్‌ విభిన్నమైన ప్రపంచంలో కనిపించనున్న ‘రాకా’పై ఈ వ్యాఖ్యలతో అంచనాలు మరింత పెరిగాయి.