అడివి శేష్ బర్త్‌డే ట్రీట్ – రేపు విడుదల కానున్న డకాయిట్‌ టీజర్!

పాన్-ఇండియా విజయాలతో ప్రేక్షకులను ఆకట్టుకున్న అడివి శేష్, తన తదుపరి చిత్రం డకాయిట్ తో మరోసారి సిద్ధమయ్యాడు. ఈ చిత్రానికి షానీల్‌ డియో దర్శకత్వం వహిస్తున్నారు. ప్రేమ, ప్రతీకారం అంశాలతో ముడిపడిన డార్క్ ఎమోషనల్ కథగా ఈ సినిమా రూపొందుతోంది. మృణాల్ ఠాకూర్ హీరోయిన్‌గా నటించగా, బాలీవుడ్ దర్శకుడు అనురాగ్ కశ్యప్ ఒక కీలక పాత్రలో పోలీస్ ఆఫీసర్‌గా కనిపించనున్నారు.

శేష్ పుట్టినరోజు సందర్భంగా మూవీ టీమ్ ఒక ప్రత్యేక పోస్టర్‌ను విడుదల చేసింది. అందులో ఆయన చేతికి సంకెళ్ళు వేసుకుని, సిగరెట్ పట్టుకుని, గంభీరమైన చూపుతో కనిపిస్తున్నారు. ముఖంపై ఉన్న గాయాలు, రగ్డ్ లుక్‌ — ఆయన పాత్రలోని తీవ్రతను, అంతర్గత బాధను స్పష్టంగా తెలియజేస్తున్నాయి. ఈ సందర్భంగా రేపు టీజర్ విడుదల కానుందని కూడా ప్రకటించారు. తెలుగు టీజర్‌ను హైదరాబాద్‌ లో, హిందీ టీజర్‌ను ముంబై లో ఆవిష్కరించనున్నారు.

ఈ చిత్రాన్ని సుప్రియా యర్లగడ్డ నిర్మించగా, సునీల్ నారంగ్ సహ నిర్మాతగా వ్యవహరిస్తున్నారు. డకాయిట్ చిత్రం ప్రపంచవ్యాప్తంగా మార్చి 19, 2026, ఉగాది పండుగ సందర్భంగా విడుదల కానుంది.