మహిళా సాధికారతపై యాక్షన్ డ్రామా విడుదలకు సిద్ధం

సమాజంలో ఎవరికైనా అన్యాయం జరిగితే దాని కోసం పోరాడాలనే సందేశాన్ని అందించే సినిమా ‘బ్లాస్ట్ జోన్’ అని నటుడు అర్జున్ సర్జా తెలిపారు. ఆయనతో పాటు అభిరామి, ప్రీతి ముకుందన్ ప్రధాన పాత్రల్లో నటించిన ఈ చిత్రాన్ని సుభాష్ కె.రాజ్ దర్శకత్వంలో ఏజీఎస్ ఎంటర్‌టైన్‌మెంట్ నిర్మించింది. ఈ నెల 28న విడుదల కానున్న ఈ చిత్రాన్ని తెలుగు రాష్ట్రాల్లో సితార ఎంటర్‌టైన్‌మెంట్స్ విడుదల చేస్తోంది. ఈ సందర్భంగా హైదరాబాద్‌లో జరిగిన ప్రీ రిలీజ్ ఈవెంట్‌లో చిత్రబృందం పాల్గొంది.

అర్జున్ మాట్లాడుతూ ఈ చిత్రం పూర్తి అయిన తర్వాత చూసినప్పుడు సంతృప్తి కలిగించే చిత్రమని చెప్పారు. ముఖ్యంగా మహిళలకు ధైర్యం, ఆత్మరక్షణ అవసరాన్ని ఈ సినిమా చూపిస్తుందని తెలిపారు. అభిరామి, ప్రీతి ముకుందన్ ప్రత్యేక శిక్షణతో అద్భుతంగా యాక్షన్ సన్నివేశాలు చేశారని ప్రశంసించారు. దర్శకుడు సుభాష్ కె.రాజ్ తక్కువ వయసులోనే గొప్పగా సినిమాను తెరకెక్కించారని అన్నారు. అభిరామి మాట్లాడుతూ తన కెరీర్‌లో మొదటిసారి యాక్షన్ సన్నివేశాల్లో నటించానని, ఈ సినిమా కోసం ఎంతో కష్టపడ్డానని చెప్పారు. ప్రీతి ముకుందన్ అర్జున్‌తో కలిసి నటించడం గొప్ప అనుభవమని తెలిపారు.