యష్ vs నాని.. బాక్సాఫీస్ వార్‌కు రంగం సిద్ధమా?

కన్నడ రాకింగ్ స్టార్ యష్ నటిస్తున్న భారీ పాన్ ఇండియా చిత్రం ‘టాక్సిక్: ఎ ఫెయిరీ టేల్ ఫర్ గ్రోన్-అప్స్’ విడుదల తేదీపై మరోసారి చర్చ మొదలైంది. కేజీఎఫ్ 2 తర్వాత యష్ నటిస్తున్న ఈ చిత్రానికి గీతూ మోహన్‌దాస్ దర్శకత్వం వహిస్తున్నారు. కియారా అద్వానీ, నయనతార, హుమా ఖురేషి, తారా సుతారియా, రుక్మిణి వసంత్ కీలక పాత్రల్లో నటిస్తున్నారు. మొదట మార్చి, తర్వాత జూన్ విడుదలను లక్ష్యంగా పెట్టుకున్న ఈ చిత్రం పలు కారణాలతో వాయిదా పడింది. ఇటీవల రీషూట్లపై వచ్చిన వార్తలను నిర్మాతలు ఖండించగా, ఆగస్టు చివరి వారంలో విడుదల చేసే అవకాశాలు ఉన్నట్లు సినీ వర్గాల్లో ప్రచారం జరుగుతోంది.

అదే సమయంలో నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో తెరకెక్కుతున్న ‘ది ప్యారడైజ్’ ఆగస్టు 21న విడుదలకు సిద్ధమవుతోంది. ‘దసరా’ తర్వాత వస్తున్న ఈ కాంబినేషన్‌పై ఇప్పటికే భారీ అంచనాలు నెలకొన్నాయి. ఒకవేళ ‘టాక్సిక్’ కూడా ఆగస్టులోనే విడుదలైతే దక్షిణ భారత బాక్సాఫీస్ వద్ద ఆసక్తికర పోటీ నెలకొనే అవకాశం ఉంది. అయితే యష్ సినిమా విడుదల తేదీపై అధికారిక ప్రకటన వెలువడాల్సి ఉంది. విడుదల తేదీ ఖరారైన తర్వాతే ఈ క్లాష్‌పై పూర్తి స్పష్టత రానుంది.