హాలీవుడ్‌లో ‘టాక్సిక్’ సంగీత సందడి?

కన్నడ నటుడు యష్ ప్రధాన పాత్రలో నటిస్తున్న ‘టాక్సిక్’పై దేశవ్యాప్తంగా భారీ అంచనాలు నెలకొన్నాయి. గీతూ మోహన్ దాస్ దర్శకత్వంలో రూపొందుతున్న ఈ చిత్రంలో యష్ డ్యూయల్ షేడ్స్‌లో కనిపించనుండగా, కియారా అద్వానీ, రుక్మిణి వసంత్, నయనతార, హుమా ఖురేషి, తారా సుతారియా కీలక పాత్రల్లో నటిస్తున్నారు. భారీ స్థాయిలో తెరకెక్కుతున్న ఈ చిత్రానికి సంగీతం కూడా ప్రత్యేక ఆకర్షణగా నిలవనుంది. ఇప్పటికే బ్యాక్‌గ్రౌండ్ స్కోర్ బాధ్యతలను రవి బాసృర్ నిర్వహిస్తుండగా, పాటల కోసం బాలీవుడ్ సంగీత దర్శకులను ఎంపిక చేశారు.

ఈ నేపథ్యంలో ప్రముఖ సంగీత దర్శకుడు విశాల్ మిశ్రా చేసిన సోషల్ మీడియా పోస్ట్ అభిమానుల్లో ఆసక్తిని రేకెత్తించింది. ‘కుకింగ్ ఇన్ హాలీవుడ్’ అంటూ ఆయన పంచుకున్న ఫొటో ప్రస్తుతం వైరల్ అవుతోంది. కాలిఫోర్నియాలోని స్టూడియోలో ‘టాక్సిక్’ కోసం కొత్త పాటపై పనిచేస్తున్నట్లు సమాచారం. ఇదే విషయంపై సాహిత్య రచయిత రామజోగయ్య శాస్త్రి కూడా ఆసక్తికర సంకేతాలు ఇచ్చారు. దీంతో ఈ పాటపై అభిమానుల్లో అంచనాలు పెరిగాయి. యష్, కేవీఎన్ ప్రొడక్షన్స్ సంయుక్తంగా నిర్మిస్తున్న ఈ భారీ చిత్రాన్ని ఆగస్టు 26న ప్రపంచవ్యాప్తంగా విడుదల చేయడానికి మేకర్స్ సన్నాహాలు చేస్తున్నారు.