రష్మికపై ట్రోల్స్.. బాలీవుడ్ డైరెక్టర్ జావేద్ అఖ్తర్ సపోర్ట్.. కానీ?

నటి రష్మికా మందన్న హిందీలో మాట్లాడే సమయంలో ఉచ్ఛారణ సరిగా లేదంటూ సామాజిక మాధ్యమాల్లో జరుగుతున్న విమర్శలపై ప్రముఖ గేయ రచయిత జావేద్ అఖ్తర్ స్పందించారు. ఒక వ్యక్తి మాట్లాడే భాషను ఆధారంగా చేసుకుని అవమానించడం సరైన పద్ధతి కాదని ఆయన అభిప్రాయపడినట్లు సమాచారం. మరో భాషలో స్పష్టంగా మాట్లాడటం అంత సులభమైన విషయం కాదని, అందుకోసం సమయం, సాధన అవసరమని పేర్కొంటూ రష్మికకు మద్దతుగా నిలిచారు.

భాష విషయంలో ఇతరులను కించపరిచే ధోరణి ఆమోదయోగ్యం కాదన్న ఆయన వ్యాఖ్యలు చర్చనీయాంశంగా మారాయి. అయితే రష్మికను తమిళ నటిగా పేర్కొన్నట్లు ప్రచారం కావడం మాత్రం పలువురిని ఆశ్చర్యానికి గురిచేస్తోంది. కన్నడ చిత్ర పరిశ్రమ నుంచి ప్రయాణం ప్రారంభించి, తెలుగు, హిందీ సినిమాలతోనూ గుర్తింపు తెచ్చుకున్న రష్మిక విషయంలో ఈ ప్రస్తావన ఆసక్తికరంగా మారింది. భాషా పరిజ్ఞానం ఆధారంగా నటీనటుల ప్రతిభను అంచనా వేయడం ఎంతవరకు సమంజసమనే చర్చకు ఈ పరిణామం తెరతీసింది.