ఆసిన్ కుమార్తె గురించి రాహుల్ శర్మ ఆసక్తికర విషయాలు

నటి ఆసిన్, మైక్రోమ్యాక్స్ సహ వ్యవస్థాపకుడు రాహుల్ శర్మ దంపతుల కుమార్తె అరిన్ రయాన్ శర్మ తన భాషా పరిజ్ఞానంతో అందరి దృష్టిని ఆకర్షిస్తోంది. కేవలం ఏడేళ్ల వయసులోనే అరిన్ కొరియన్, జపనీస్, థాయ్, చైనీస్ సహా సుమారు 12 భాషలను అర్థం చేసుకుని మాట్లాడగలదని రాహుల్ శర్మ వెల్లడించారు. ‘మైగవ్ ఇండియా’కు ఇచ్చిన ఇంటర్వ్యూలో ఆయన తమ కుమార్తె పెంపకం గురించి ఆసక్తికర విషయాలను పంచుకున్నారు. తనకు ఇంగ్లీష్, హిందీ భాషలే వచ్చని, రెండు భాషలు మాట్లాడటమే తనకు కష్టంగా ఉంటుందని ఆయన సరదాగా వ్యాఖ్యానించారు.

అరిన్ పెంపకంలో తాము ప్రత్యేక శ్రద్ధ తీసుకుంటున్నామని రాహుల్ శర్మ తెలిపారు. తమ ఇంట్లో టెలివిజన్ లేదని, అరిన్‌కు సొంతంగా ఫోన్ కూడా ఇవ్వలేదని వివరించారు. బదులుగా పుస్తకాలకు ఎక్కువ ప్రాధాన్యం ఇస్తున్నామని, ఇంట్లో ఎన్నో పుస్తకాలు అందుబాటులో ఉంచామని చెప్పారు. పిల్లల అభ్యాసం, భాషలపై ఆసక్తిని పెంపొందించడంలో పుస్తకాలు కీలక పాత్ర పోషిస్తాయని ఈ విధానం తెలియజేస్తోంది. అరిన్ భాషా నైపుణ్యాల గురించి రాహుల్ శర్మ వెల్లడించిన విషయాలు ఇప్పుడు ఆసక్తికరంగా మారాయి.