స్పిరిట్, కల్కి 2 తర్వాత.. మరో గ్లోబల్ ప్రాజెక్ట్ నుంచి దీపిక ఔట్?

బాలీవుడ్ స్టార్ హీరోయిన్ దీపికా పదుకొణే గురించి ప్రత్యేకంగా చెప్పాల్సిన అవసరం లేదు. ఇటీవలి కాలంలో ఆమె వరుసగా పాన్ ఇండియా మరియు అంతర్జాతీయ ప్రాజెక్టులు వదులుకోవడంతో ఇండస్ట్రీలో చర్చనీయాంశంగా మారారు. ముఖ్యంగా ప్రభాస్‌తో నటించిన కల్కి 2898 AD సీక్వెల్ మరియు స్పిరిట్ సినిమాల నుంచి ఆమె తప్పుకున్నట్టు వార్తలు వచ్చాయి. వర్కింగ్ అవర్స్ కండిషన్లు సెట్ కాకపోవడం దీనికి కారణమని తెలుస్తోంది.

ఇక ఇప్పుడు హాలీవుడ్ ప్రాజెక్ట్ ది వైట్ లోటస్ సీజన్ 4 లో నటించే అవకాశం కూడా దీపికా వదులుకున్నారని వార్తలు వస్తున్నాయి. హెచ్‌బీఓలో ప్రసారమయ్యే ఈ సిరీస్ ప్రపంచవ్యాప్తంగా పేరు గాంచింది. ఈ ప్రాజెక్ట్ కోసం దీపికను ఆడిషన్‌కి రావాలని మేకర్స్ కోరినట్లు సమాచారం. అయితే, తన స్థాయికి తగ్గట్టుగా నేరుగా ఆఫర్ రావాలని ఆమె భావించి ఆడిషన్ ఇవ్వలేదని టాక్. దీంతో మేకర్స్ మరో అంతర్జాతీయ నటి వైపు మొగ్గుచూపినట్లు తెలుస్తోంది.

హాలీవుడ్‌లో  xXx:రిటర్న్ ఆఫ్ క్సాండర్ కేజ్ సినిమాతో మంచి గుర్తింపు తెచ్చుకున్న దీపికా, ప్రస్తుతం స్క్రిప్ట్ ఎంపికలో జాగ్రత్తగా వ్యవహరిస్తున్నారని సినీ వర్గాలు చెబుతున్నాయి. అభిమానులు మాత్రం సోషల్ మీడియాలో మిక్స్‌డ్ రియాక్షన్లు ఇస్తున్నారు - కొందరు ఆమె నిర్ణయానికి మద్దతు తెలుపుతుండగా, మరికొందరు "ఇంత మంచి అవకాశం ఎందుకు వదులుకుంది?" అని ప్రశ్నిస్తున్నారు.