మొహర్రం ఎందుకు పవిత్రం? ప్రతి ఒక్కరూ తెలుసుకోవాల్సిన విషయం

ఇస్లామీయ హిజ్రీ క్యాలెండర్‌లో తొలి మాసమైన మొహర్రం విశ్వాసం, త్యాగం, సహనం, న్యాయం, అల్లాహ్‌ పట్ల విధేయతకు ప్రతీకగా నిలుస్తుంది. పన్నెండు మాసాల్లో నాలుగు పవిత్ర మాసాల్లో ఒకటైన మొహర్రంను దైవప్రవక్త మహమ్మద్‌ ‘అల్లాహ్‌ మాసం’గా పేర్కొన్నారు. రంజాన్‌ తర్వాత అత్యుత్తమ ఉపవాసాలు ఈ మాసంలో పాటించేవేనని హదీసులు తెలియజేస్తున్నాయి.

మొహర్రం పదో రోజును ఆశూరా దినంగా పరిగణిస్తారు. ఈ రోజున ప్రవక్త మూసా మరియు బనీ ఇజ్రాయిల్‌ ప్రజలను ఫిరౌన్‌ దౌర్జన్యం నుంచి అల్లాహ్‌ రక్షించినట్లు ఇస్లామీయ సంప్రదాయాలు చెబుతున్నాయి. అందుకే ఆశూరా రోజున ఉపవాసం పాటించడాన్ని దైవప్రవక్త మహమ్మద్‌ ప్రోత్సహించారు.

మొహర్రం మాసంలో అత్యంత విషాదకర సంఘటన కర్బలా యుద్ధం. ఇమామ్‌ హుస్సేన్ సత్యం, న్యాయం కోసం పోరాడుతూ తన కుటుంబ సభ్యులు, సహచరులతో కలిసి అమరులయ్యారు. కర్బలా సందేశం అన్యాయానికి తలవంచకూడదని, సత్యం కోసం త్యాగం చేయాలని, అల్లాహ్‌ పట్ల విశ్వాసంతో జీవించాలని మానవాళికి బోధిస్తోంది.