సూర్య భగవానుడి రథానికి ఏడు గుర్రాలే ఎందుకు?

హిందూ పురాణాల్లో సూర్య భగవానుడికి ప్రత్యేక స్థానం ఉంది. సమస్త జీవరాశికి వెలుగు, శక్తి, జీవనాధారాన్ని అందించే దేవుడిగా సూర్యుడిని భక్తులు ఆరాధిస్తారు. పురాణాల ప్రకారం.. సూర్య భగవానుడు ప్రతిరోజూ అరుణుడిని సారథిగా చేసుకుని ఏడు గుర్రాలు లాగే దివ్య రథంపై ప్రయాణిస్తూ లోకానికి వెలుగును ప్రసాదిస్తాడు. ఈ ఏడు గుర్రాలు కేవలం రథాన్ని లాగే జంతువులే కాకుండా.. విశ్వశక్తి, కాలచక్రం, చలనం, కాంతికి ప్రతీకలుగా భావిస్తారు. వేద సంప్రదాయం ప్రకారం ఈ ఏడు గుర్రాలను గాయత్రి, త్రిష్టుప్, జగతి, అనుష్టుప్, పంక్తి, బృహతి, ఉష్ణిక్ అనే ఏడు వేద ఛందస్సులతో అనుసంధానిస్తారు. ఇవి వేద మంత్రాల లయ, నిర్మాణానికి సంబంధించిన ఛందస్సులు. అందువల్ల సూర్యుడి ఏడు గుర్రాలు వేద జ్ఞానం, ఆధ్యాత్మిక శక్తికి ప్రతీకలుగా కూడా పరిగణించబడుతున్నాయి.

సూర్యుడి రథంలోని ఏడు గుర్రాలకు ఇంద్రధనుస్సులోని ఏడు రంగులతోనూ ప్రతీకాత్మక సంబంధం ఉందని చెబుతారు. అవి ఊదా, ఇండిగో, నీలం, ఆకుపచ్చ, పసుపు, నారింజ, ఎరుపు రంగులు. శాస్త్రీయంగా సూర్యకాంతి తెల్లగా కనిపించినప్పటికీ.. పట్టకం గుండా వెళ్లినప్పుడు ఏడు రంగులుగా విడిపోతుంది. అలాగే భారతీయ సంప్రదాయం, జ్యోతిష్య శాస్త్రం ప్రకారం వారంలోని ఏడు రోజులను ఏడు గ్రహాలతో అనుసంధానిస్తారు. ఆదివారం సూర్యుడు, సోమవారం చంద్రుడు, మంగళవారం కుజుడు, బుధవారం బుధుడు, గురువారం గురుడు, శుక్రవారం శుక్రుడు, శనివారం శనితో సంబంధం కలిగి ఉంటాయి. సూర్య భగవానుడిని ఆరోగ్యం, తేజస్సు, ఆత్మవిశ్వాసం, నాయకత్వం, అధికారం, గౌరవానికి ప్రతీకగా భావిస్తారు. అందుకే ఉదయాన్నే సూర్యుడికి అర్ఘ్యం సమర్పించడం, ఆదిత్య హృదయ స్తోత్రాన్ని పఠించడం సంప్రదాయంగా వస్తోంది. ఇదిలా ఉండగా.. పంచాంగం ప్రకారం 2026 నవంబర్ 16న సాయంత్రం 7:39 గంటలకు సూర్యుడు తులారాశి నుంచి వృశ్చిక రాశిలోకి ప్రవేశించనున్నాడు. డిసెంబర్ 16 వరకు అక్కడే సంచరిస్తాడు. వృశ్చిక రాశికి అధిపతి కుజుడు కావడంతో.. సూర్యుడి అధికారం, ఆత్మవిశ్వాసానికి కుజుడి ధైర్యం, పరాక్రమం తోడవుతాయని జ్యోతిష్య శాస్త్రంలో ఈ సంచారానికి ప్రత్యేక ప్రాధాన్యత ఇస్తారు.