హిమాలయాల్లో విజయవాడ యువకుడి అరుదైన ఘనత

విజయవాడకు చెందిన ఫిట్‌నెస్ యూట్యూబర్ ఫ్లెక్సాంథర్ మణి (మణికుమార్ చింతలపూడి) తన స్నేహితులు దివ్య, శివ మణి, గాయత్రిలతో కలిసి నేపాల్‌లోని ప్రపంచ ప్రఖ్యాత హిమాలయ పర్వత ప్రాంతంలో అత్యంత క్లిష్టమైన ట్రెక్కింగ్ యాత్రను విజయవంతంగా పూర్తి చేశారు. ఈ బృందం 4,919 మీటర్ల ఎత్తులో ఉన్న టిలిచో సరస్సు మరియు 5,416 మీటర్ల ఎత్తులోని థొరాంగ్ లా పాస్ వరకు చేరుకుని భారత జాతీయ జెండాను ఎగురవేసింది.

ప్రపంచంలోనే అత్యంత సవాలుగా భావించే అన్నపూర్ణ సర్క్యూట్ ట్రెక్‌లో భాగంగా ఈ నలుగురు సభ్యులు చామే నుంచి ముక్తినాథ్ దేవాలయం వరకు కేవలం ఎనిమిది రోజుల్లో ప్రయాణాన్ని పూర్తి చేశారు. తక్కువ ఆక్సిజన్, ఎత్తైన పర్వతాలు, తీవ్ర చలి మరియు క్లిష్టమైన మార్గాలను అధిగమిస్తూ ఈ ఘనత సాధించారు. ట్రెక్కింగ్ అనంతరం భారత జెండాతో దిగిన ఫోటోలు ప్రత్యేక ఆకర్షణగా నిలిచాయి. వారి ఫిట్‌నెస్, క్రమశిక్షణ, మానసిక దృఢత్వాన్ని పలువురు ప్రశంసించారు.