తెలంగాణ పోలీస్‌ ఉద్యోగ నోటిఫికేషన్‌పై నిరుద్యోగుల అసంతృప్తి

తెలంగాణలో పోలీస్‌ ఉద్యోగాల కోసం ఎదురుచూస్తున్న నిరుద్యోగులకు తాజా నోటిఫికేషన్‌ నిరాశ కలిగించిందనే అభిప్రాయాలు వ్యక్తమవుతున్నాయి. రాష్ట్రంలో పోలీసు విభాగంలో ఖాళీలు భారీగా ఉన్నప్పటికీ, వాటిలో సగం పోస్టులకు మాత్రమే నోటిఫికేషన్‌ జారీ చేశారని అభ్యర్థులు ఆవేదన వ్యక్తం చేస్తున్నారు. పలు జిల్లాలు, జోన్లలో సింగిల్‌ డిజిట్‌ పోస్టులు మాత్రమే ఉండటం, కొన్ని ప్రాంతాల్లో పోస్టులు లేకపోవడం వల్ల అవకాశాలు పరిమితమయ్యాయని చెబుతున్నారు.

26 జిల్లాల్లో మాత్రమే సివిల్‌, ఏఆర్‌ కానిస్టేబుల్‌ పోస్టులు ఉన్నాయని, జోన్‌-3, 5, 6, 7 పరిధిలో ఆర్‌ఎస్‌ఐ, ఏఆర్‌ పోస్టులు లేకపోవడంపై ఆశావహులు అసంతృప్తి వ్యక్తం చేస్తున్నారు. ‘క్యూర్‌’ పరిధిలో కానిస్టేబుల్‌ పోస్టులు లేకపోవడం కూడా అభ్యర్థులను నిరాశకు గురిచేసిందని చెబుతున్నారు. జిల్లాలు, జోన్ల వారీగా పోస్టుల కేటాయింపులో సమతుల్యత లేదని అభ్యర్థులు అంటున్నారు. తదుపరి నోటిఫికేషన్‌ వచ్చే నాటికి వయోపరిమితి దాటిపోయి అర్హత కోల్పోయే పరిస్థితి ఏర్పడుతుందని ఆందోళన వ్యక్తం చేస్తున్నారు.