పాకిస్థాన్ మాజీ క్రికెటర్ ఇంట విషాదం

పాకిస్థాన్ మాజీ క్రికెటర్, రావల్పిండి ఎక్స్‌ప్రెస్‌గా పేరుగాంచిన షోయబ్ అక్తర్ కుటుంబంలో విషాదం నెలకొంది. ఆయన పెద్దన్నయ్య షాహిద్ అక్తర్ మంగళవారం అర్ధరాత్రి కన్నుమూశారు. ఈ విషయాన్ని షోయబ్ అక్తర్ తన సామాజిక మాధ్యమాల ద్వారా వెల్లడిస్తూ తీవ్ర దిగ్భ్రాంతి వ్యక్తం చేశారు. తన ప్రియమైన సోదరుడు అల్లా చెంతకు చేరాడని పేర్కొంటూ భావోద్వేగ సందేశాన్ని పంచుకున్నారు.

షాహిద్ అక్తర్ మరణానికి గల కారణాలు ఇంకా వెల్లడికాలేదు. హెచ్ 8 స్మశానవాటికలో అంత్యక్రియలు నిర్వహించనున్నట్లు సమాచారం. ఇప్పటికే 2021లో తన తల్లిని కోల్పోయిన షోయబ్ అక్తర్, ఇప్పుడు తన అన్నయ్యను కూడా కోల్పోవడంతో కుటుంబంలో తీవ్ర విషాదం నెలకొంది. పలువురు మాజీ క్రికెటర్లు, అభిమానులు అక్తర్ కుటుంబానికి సానుభూతి తెలియజేస్తున్నారు.