తెలంగాణ జైళ్ల శాఖకు స్కోచ్‌ అవార్డు.. ‘నివృత్తి’కి జాతీయ గుర్తింపు

తెలంగాణ జైళ్లు, దిద్దుబాటు సేవల శాఖకు ప్రతిష్ఠాత్మక స్కోచ్‌ అవార్డు-2026 లభించింది. జైళ్లలో ‘నివృత్తి’ పేరుతో వ్యసన విముక్తి కేంద్రాలను ఏర్పాటు చేసి, మాదకద్రవ్యాల వినియోగంతో ప్రభావితమైన ఖైదీలకు పునరావాస సేవలు అందిస్తున్నందుకు ఈ పురస్కారం దక్కింది. దిల్లీలోని ఇండియా హ్యాబిటాట్‌ సెంటర్‌లో జరిగిన 109వ స్కోచ్‌ సమిట్‌-ఇండియా ఎకనామిక్‌ ఫోరంలో తెలంగాణ జైళ్ల శాఖ డీజీ డా. సౌమ్యమిశ్రా స్కోచ్‌ ప్రతినిధులు రోహన్‌ కొచ్చర్, సమీర్‌ కొచ్చర్‌ చేతుల మీదుగా అవార్డును స్వీకరించారు. కేంద్ర సామాజిక న్యాయం, సాధికారత మంత్రిత్వశాఖ ఆధ్వర్యంలోని ‘నేషనల్‌ యాక్షన్‌ ప్లాన్‌ ఫర్‌ డ్రగ్‌ డిమాండ్‌ రిడక్షన్‌’ కార్యక్రమాన్ని జైళ్లలో సమర్థంగా అమలు చేసినందుకు ఈ గుర్తింపు లభించింది.

‘నివృత్తి’ కార్యక్రమంలో భాగంగా మాదకద్రవ్యాల వినియోగంతో ప్రభావితమైన ఖైదీలను తొలిదశలో గుర్తించడం, స్క్రీనింగ్‌, కౌన్సెలింగ్‌, చికిత్స సేవలతో అనుసంధానం చేయడంపై జైళ్ల శాఖ దృష్టి సారించింది. హైదరాబాద్‌, చర్లపల్లి, సంగారెడ్డి, నిజామాబాద్‌ కేంద్ర కారాగారాలతో పాటు హైదరాబాద్‌ మహిళా ప్రత్యేక కారాగారంలో డీఅడిక్షన్‌ కేంద్రాలను ఏర్పాటు చేశారు. ఇప్పటివరకు 4,200 మంది ఖైదీలను స్క్రీనింగ్‌ చేసి, 2,126 మందికి కౌన్సెలింగ్‌, చికిత్సకు అవసరమైన సహాయం అందించారు. విడుదలైన తర్వాత 300 మంది మాజీ ఖైదీలకు కూడా సహకారం అందించారు. ఖైదీలు వ్యసనాన్ని అధిగమించి ఆత్మవిశ్వాసంతో జీవితాలను పునర్నిర్మించుకునేలా చేయడమే ‘నివృత్తి’ లక్ష్యమని డా. సౌమ్యమిశ్రా తెలిపారు.