ఇరిగేషన్ భూముల్లో సౌర విద్యుత్ ప్లాంట్లు ఏర్పాటు చేయాలి - చంద్రబాబు

ఇరిగేషన్ శాఖకు చెందిన భూముల్లో సౌర విద్యుత్ ప్లాంట్లు ఏర్పాటు చేయాలని ఆంధ్రప్రదేశ్ ముఖ్యమంత్రి చంద్రబాబు నాయుడు అధికారులను ఆదేశించారు. బుధవారం సాగునీటి ప్రాజెక్టులు, ఎత్తిపోతల పథకాలపై నిర్వహించిన సమీక్షా సమావేశంలో ఆయన ఈ సూచనలు చేశారు. ఈ సందర్భంగా ఎత్తిపోతల పథకాల మరమ్మతులు, నిర్వహణకు సంబంధించిన అంశాలపై చర్చించారు. ఆయా ప్రాజెక్టుల పర్యవేక్షణ, నిర్వహణ బాధ్యతలను జలహారతి కార్పొరేషన్ ద్వారా చేపట్టాలని అధికారులకు సూచించారు.

రాష్ట్రంలో వాటర్ రెగ్యులేటరీ కమిషన్ ఏర్పాటు చేసే అంశంపై కూడా అధ్యయనం చేయాలని సీఎం ఆదేశించారు. ప్రభుత్వం గుర్తించిన 36 సాగునీటి ప్రాజెక్టులను రెండున్నరేళ్లలో పూర్తి చేయాలని స్పష్టం చేశారు. ఇప్పటికే ఉన్న ఎత్తిపోతల పథకాల నిర్వహణను మెరుగుపరచడంతో పాటు, ప్రాజెక్టుల పర్యవేక్షణను పటిష్ఠం చేసి, పనులను వేగవంతం చేయాలని అధికారులకు సూచించారు. నిర్దేశించిన గడువులోగా సాగునీటి ప్రాజెక్టులను పూర్తి చేసేలా ప్రణాళికాబద్ధంగా ముందుకు సాగాలని చంద్రబాబు తెలిపారు.