ఫిఫా వరల్డ్ కప్‌ జర్మనీ శిబిరంలో పాము కలకలం..

ఫిఫా ప్రపంచ కప్ కోసం అమెరికాలోని నార్త్ కరోలినాలో శిబిరం ఏర్పాటు చేసుకున్న జర్మనీ జట్టుకు అనుకోని అనుభవం ఎదురైంది. విన్‌స్టన్-సేలంలోని క్యాంప్ పరిసరాల్లో గడ్డి కింద ఒక విషపూరిత పాము కనిపించడంతో ఆటగాళ్లు, సిబ్బంది అప్రమత్తమయ్యారు. జర్మనీ జట్టుతో పాటు స్విట్జర్లాండ్, నార్వే ఆటగాళ్లకు కూడా పాములు కనిపించాయని సమాచారం. దీంతో భద్రతాపరమైన ఆందోళనలు వ్యక్తమయ్యాయి.

ఈ ఘటనపై స్పందించిన జర్మనీ కెప్టెన్ జాషువా కిమ్మిచ్, జర్మనీలో ఉంటే వ్యూహాలు, గాయాలు, ప్రత్యర్థుల గురించి మాత్రమే ఆలోచిస్తామని, కానీ ఇక్కడ గడ్డిలో ఏముందో కూడా ఆలోచించాల్సి వస్తోందని వ్యాఖ్యానించాడు. ఆటగాళ్లు చూసిన పాము కాపర్‌హెడ్ జాతికి చెందినదిగా భావిస్తున్నారు. నార్త్ కరోలినాలో సాధారణంగా కనిపించే ఈ పాము విషపూరితమైనదే అయినప్పటికీ, ఈ ఘటనలో ఎవరికీ ఎలాంటి హాని జరగలేదని ఫిఫా అధికారులు తెలిపారు.