నేడు తెలంగాణ కేబినెట్ భేటీ.. రైతు భరోసాపై కీలక నిర్ణయం

తెలంగాణ ముఖ్యమంత్రి రేవంత్‌రెడ్డి అధ్యక్షతన నేడు సాయంత్రం 4 గంటలకు రాష్ట్ర కేబినెట్ సమావేశం జరగనుంది. ఈ భేటీకి ముందు మధ్యాహ్నం 3 గంటలకు మంత్రులతో సీఎం అనధికారికంగా సమావేశం కానున్నారు. డిసెంబర్ 7, 8, 9 తేదీల్లో ఫ్యూచర్ సిటీలో నిర్వహించనున్న ఇన్వెస్ట్ తెలంగాణ గ్లోబల్ సమ్మిట్‌-2026 ఏర్పాట్లు, నిర్వహణకు సంబంధించిన అంశాలపై కేబినెట్ ప్రధానంగా చర్చించనుంది. అలాగే ఎల్‌నినో ప్రభావాన్ని ఎదుర్కొనేందుకు చేపట్టాల్సిన చర్యలు, దీనిపై మంత్రుల ఉపసంఘం సమర్పించిన నివేదికపైనా చర్చించే అవకాశం ఉంది.

రైతు భరోసా, కరువు సహాయం అంశాలపై కూడా కేబినెట్ కీలక నిర్ణయాలు తీసుకునే అవకాశం ఉందని తెలుస్తోంది. రేషన్ కార్డుదారులకు నిత్యావసర సరుకుల పంపిణీ, పట్టణ ప్రాంతాల్లో వీబీజీ రాంజీ పథకం అమలు అవకాశాలపై చర్చించనున్నారు. రాష్ట్రానికి కేంద్ర ప్రభుత్వం నుంచి సహాయం కోరే అంశంపై అఖిలపక్ష నేతలను ఢిల్లీకి తీసుకెళ్లే విషయంపైనా మంత్రివర్గం నిర్ణయం తీసుకునే అవకాశం ఉంది. ఈ సమావేశంలో పలు కీలక అంశాలపై ప్రభుత్వం స్పష్టత ఇచ్చే అవకాశం ఉండటంతో కేబినెట్ భేటీపై ఆసక్తి నెలకొంది.