జాతీయ ర్యాంకింగ్స్‌లో సత్తా చాటిన ఉస్మానియా యూనివర్సిటీ...

ఉస్మానియా యూనివర్సిటీ మరోసారి జాతీయ స్థాయిలో తన సత్తాను చాటుకుంది. విద్య, పరిశోధన రంగాల్లో విశిష్టతను కొనసాగిస్తూ 2026 సంవత్సరానికి సంబంధించిన ప్రతిష్ఠాత్మక జాతీయ ర్యాంకింగ్స్‌లో పలు అగ్రస్థానాలను దక్కించుకుంది. ఇండియా టుడే బెస్ట్ యూనివర్సిటీస్ సర్వే 2026 ప్రకారం.. దేశంలోని అగ్రగామి జనరల్ ప్రభుత్వ విశ్వవిద్యాలయాల విభాగంలో ఓయూ 4వ ర్యాంక్ సాధించింది. బోధనా ప్రమాణాలు, పరిశోధన, మౌలిక వసతులు, అకడమిక్ నిర్వహణ వంటి అంశాల్లో ఓయూ ప్రదర్శించిన ప్రతిభకు ఈ ర్యాంక్ నిదర్శనంగా నిలిచింది. ఈ జాతీయ ర్యాంకింగ్స్‌లో తెలంగాణ నుంచి చోటు దక్కించుకున్న ఏకైక విశ్వవిద్యాలయం ఓయూ కావడం విశేషం. ఈ విజయంపై వీసీ ప్రొఫెసర్ కుమార్ మొలుగరం హర్షం వ్యక్తం చేశారు.

మరోవైపు ఔట్‌లుక్-ఐకేర్ ర్యాంకింగ్స్ 2026లో టాప్ 75 స్టేట్ పబ్లిక్ యూనివర్సిటీల విభాగంలో ఓయూ 13వ ర్యాంక్ సాధించింది. పరిశ్రమల భాగస్వామ్యం, విద్యార్థుల అభ్యసన ఫలితాలు, వైవిధ్యత వంటి అంశాల్లో విశ్వవిద్యాలయం సాధించిన పురోగతికి ఈ గుర్తింపు నిదర్శనమని వీసీ తెలిపారు. ఓయూ విజయాలకు మరింత గౌరవాన్ని చేకూరుస్తూ.. యూనివర్సిటీ కాలేజ్ ఆఫ్ ఇంజనీరింగ్, ఉస్మానియా యూనివర్సిటీ (యూసీఈ-ఓయూ) జూలై 17, 2026న విడుదలైన ఔట్‌లుక్-ఐకేర్ ర్యాంకింగ్స్‌లో టాప్ 25 ప్రభుత్వ ఇంజనీరింగ్ సంస్థల విభాగంలో 18వ స్థానాన్ని దక్కించుకుంది. ఈ విజయాలను అధ్యాపకులు, పరిశోధకులు, విద్యార్థులు, బోధనేతర సిబ్బంది, పూర్వ విద్యార్థుల సమిష్టి కృషికి అంకితం చేస్తున్నట్లు వీసీ పేర్కొన్నారు. ర్యాంకింగ్స్ మరింత మెరుగైన బోధన, పరిశోధన, ప్రపంచ స్థాయి ఆవిష్కరణలకు ప్రోత్సాహాన్ని అందిస్తాయని, ఉస్మానియా యూనివర్సిటీని మరింత ఉన్నత స్థాయికి తీసుకెళ్లేందుకు అందరూ కలసికట్టుగా కృషి చేయాలని పిలుపునిచ్చారు.