పిల్లలను సోషల్ మీడియాకు దూరంగా ఉంచడం అనివార్యం - మంత్రి నారా లోకేష్

ఆంధ్రప్రదేశ్ విద్య, ఐటీ మరియు ఎలక్ట్రానిక్స్ శాఖ మంత్రి నారా లోకేష్ 13 సంవత్సరాల లోపు పిల్లలను సోషల్ మీడియాకు దూరంగా ఉంచేలా విధివిధానాలు, ముసాయిదా చట్టాన్ని సిద్ధం చేయాలని అధికారులను ఆదేశించారు. ఉండవల్లి నివాసంలో జరిగిన ఉన్నత స్థాయి సమావేశంలో మంత్రులు, అధికారులు మరియు సోషల్ మీడియా ప్రతినిధులతో కలిసి పిల్లల డిజిటల్ భద్రత, నియంత్రణ విధానాలపై చర్చించారు. పిల్లలను సోషల్ మీడియా దుష్ప్రభావాల నుంచి రక్షించడం ముఖ్యమని ఆయన స్పష్టం చేశారు.

13 నుంచి 16 సంవత్సరాల పిల్లలకు వయస్సు ఆధారిత కంటెంట్ అందుబాటులో ఉండేలా చర్యలు తీసుకోవాలని సూచించారు. సోషల్ మీడియాలో మహిళలపై అవమానకరమైన, విద్వేషపూరిత వ్యాఖ్యలు చేసే వారిపై కఠిన చర్యలు తీసుకుంటామని హెచ్చరించారు. ఆస్ట్రేలియా, సింగపూర్, డెన్మార్క్ వంటి దేశాల్లో అమలవుతున్న ఉత్తమ విధానాలను అధ్యయనం చేయాలని అధికారులను ఆదేశించారు. పాఠశాలల్లో నో బ్యాగ్ డే, మెగా పిటిఎం కార్యక్రమాల ద్వారా విద్యార్థులు, తల్లిదండ్రులు మరియు స్వయం సహాయక సంఘాల మహిళలకు సోషల్ మీడియా దుష్ప్రభావాలపై అవగాహన కల్పిస్తామని తెలిపారు.