ప్రియుడితో కలిసి కుమారుడిని హత్య చేయించిన తల్లి

కర్ణాటకలో దారుణ హత్య ఘటన వెలుగులోకి వచ్చింది. తన వివాహేతర సంబంధానికి అడ్డుగా ఉన్నాడనే కారణంతో 24 ఏళ్ల కుమారుడు విజయ్ నారాయణను హత్య చేసేందుకు 44 ఏళ్ల తల్లి మీనా నారాయణ తన ప్రియుడితో కలిసి కుట్ర పన్నినట్లు పోలీసులు గుర్తించారు. నవంబర్ 1న ఈ హత్య జరిగినట్లు దర్యాప్తులో వెల్లడైంది. కేసు దర్యాప్తులో భాగంగా బెళగావి జిల్లా మాళమారుతి పోలీసులు మీనా నారాయణ, ఆమె ప్రియుడు రాకేశ్ జామూనితో పాటు అతని స్నేహితులు సచిన్ కాంబ్లె, మనోజ్ కాంబ్లె, తమ్మణ్ణ కాంబ్లె, ఏకనాథ్ కాంబ్లెలను అరెస్టు చేశారు. మహారాష్ట్రలోని గడెహింగ్లజ తాలూకా తేరణి గ్రామానికి చెందిన రాకేశ్ కారు డ్రైవర్‌గా పనిచేస్తున్నాడు. కొన్నేళ్ల క్రితం భర్త మరణించడంతో మీనా బెంగళూరులోని ఓ బ్యూటీ పార్లర్‌లో మేనేజర్‌గా చేరింది. అక్కడే రాకేశ్‌తో పరిచయం ఏర్పడి, అది వివాహేతర సంబంధానికి దారితీసినట్లు పోలీసులు తెలిపారు.

తల్లి, రాకేశ్ మధ్య సంబంధాన్ని గుర్తించిన విజయ్ ఆమె తీరును తప్పుబట్టి, బుద్ధి చెప్పినట్లు సమాచారం. దీంతో తమ సంబంధానికి అడ్డుగా ఉన్న కుమారుడిని హత్య చేయాలని మీనా, రాకేశ్ కలిసి పథకం రచించినట్లు ప్రాథమిక దర్యాప్తులో వెల్లడైంది. నవంబర్ 1న సొంతూరు బెళగావికి వెళ్దామని చెప్పి మీనా కుమారుడిని కారులో తీసుకెళ్లింది. ప్రయాణ సమయంలో రాకేశ్‌తో కలిసి శీతల పానీయంలో నిద్రమాత్రలు కలిపి విజయ్‌కు ఇచ్చినట్లు ఆరోపణలు ఉన్నాయి. అతను నిద్రలోకి జారుకున్న తర్వాత కారులోనే శాలువాతో గొంతు బిగించి హత్య చేసినట్లు పోలీసులు గుర్తించారు. అనంతరం బెళగావి చేరుకున్నాక మృతదేహాన్ని రహదారి పక్కన పడేసి వెళ్లిపోయినట్లు తెలిపారు. ఈ హత్యలో రాకేశ్ స్నేహితులు కూడా సహకరించినట్లు ప్రాథమిక విచారణలో తేలిందని ఎస్పీ ప్రకాశ్ నిక్కం వెల్లడించారు. కేసుకు సంబంధించి మరిన్ని వివరాలను సేకరిస్తున్నట్లు తెలిపారు.