ఎయిర్ ఇండియా భవనాన్ని సొంతం చేసుకున్న మహారాష్ట్ర సర్కార్

మహారాష్ట్ర ప్రభుత్వం ముంబైలోని నరీమన్ పాయింట్ వద్ద ఉన్న చారిత్రాత్మక ఎయిర్ ఇండియా భవనాన్ని ₹1,601 కోట్లకు అధికారికంగా కొనుగోలు చేసింది. 1974 నుంచి ముంబై నగరానికి గుర్తింపుగా నిలిచిన ఈ 23 అంతస్తుల భవనం అరేబియా సముద్ర తీరాన అద్భుతంగా నిలుస్తూ నగర స్కైలైన్‌లో ప్రత్యేక స్థానాన్ని సంపాదించుకుంది. ఈ కొనుగోలు రాష్ట్ర పరిపాలనా వ్యవస్థలో కీలక మార్పులకు నాంది పలకనుంది.

ఈ భవనాన్ని వివిధ రాష్ట్ర ప్రభుత్వ శాఖలు, కార్యాలయాల కోసం వినియోగించనున్నట్లు ప్రభుత్వం ప్రకటించింది. దీంతో పరిపాలనా కార్యకలాపాలు మరింత సమర్థవంతంగా మారడంతో పాటు అద్దె భవనాలపై ఖర్చవుతున్న కోట్ల రూపాయల వ్యయం తగ్గనుంది. ముంబై చరిత్రలో ప్రత్యేక గుర్తింపు పొందిన ఈ భవనానికి కొత్త రూపం, కొత్త బాధ్యతలు లభించనున్నాయి.