ర్యాన్‌ఎయిర్ సిబ్బందిపై కుమార సంగక్కర తీవ్ర విమర్శలు

శ్రీలంక మాజీ క్రికెట్ కెప్టెన్ కుమార సంగక్కరకు ఐర్లాండ్‌లో చేదు అనుభవం ఎదురైనట్లు తెలిపారు. డబ్లిన్‌లోని ర్యాన్‌ఎయిర్ విమానయాన సంస్థ గేట్ సిబ్బంది తనతో పాటు తన కుటుంబ సభ్యుల పట్ల వివక్షపూరితంగా వ్యవహరించారని ఆయన ఆరోపించారు. సిబ్బంది మాట్లాడిన తీరు, నిబంధనలను సరిగ్గా పాటించకపోవడం, బెదిరింపులకు దిగినట్లుగా ప్రవర్తించడం ఆమోదయోగ్యం కాదని సోషల్ మీడియాలో చేసిన పోస్టులో పేర్కొన్నారు. డబ్లిన్‌లో తమకు ఎదురైన ఈ అనుభవం తీవ్ర దిగ్భ్రాంతికి గురిచేసిందని సంగక్కర వెల్లడించారు.

సంగక్కర పోస్టుపై సాఫ్ట్‌వేర్ సంస్థ డబ్ల్యూఎస్‌ఓ2 సీఈవో సంజీవ వీరవరణ స్పందిస్తూ, పాశ్చాత్య దేశాల్లో వివక్ష ఒక భాగంగా మారిందని వ్యాఖ్యానించారు. దీనికి సంగక్కర బదులిస్తూ, వివక్షను ఎదుర్కొన్నప్పుడు కలిగే అనుభవం బాధాకరంగా ఉంటుందని పేర్కొన్నారు. ఐర్లాండ్‌లోని డబ్లిన్ కేంద్రంగా కార్యకలాపాలు నిర్వహించే ర్యాన్‌ఎయిర్ యూరప్‌లోని ప్రముఖ విమానయాన సంస్థల్లో ఒకటి. అయితే, ఈ ఘటనపై సంస్థ స్పందనకు సంబంధించిన వివరాలు అందుబాటులో లేవు.