ఉత్తర కొరియా తదుపరి అధినేతగా కిమ్‌ జు-ఏ.. వారసత్వంపై చర్చ

పురుషాధిక్య పాలనకు పేరుగాంచిన ఉత్తర కొరియాలో తొలిసారిగా ఒక మహిళ దేశాధినేతగా బాధ్యతలు చేపట్టే అవకాశాలు కనిపిస్తున్నాయా? ప్రస్తుత అధినేత కిమ్‌ జోంగ్‌ ఉన్‌ తన కుమార్తె కిమ్‌ జు-ఏను వారసురాలిగా తీర్చిదిద్దుతున్నారన్న చర్చ తాజాగా ఊపందుకుంది. ఉత్తర కొరియా నుంచి పారిపోయి దక్షిణ కొరియాలో ఆశ్రయం పొందిన శరణార్థులు, దక్షిణ కొరియా నిఘా వర్గాల సమాచారం ప్రకారం.. కిమ్‌ గత నాలుగేళ్లుగా తన కుమార్తెను క్షిపణి పరీక్షలు, సైనిక కవాతులు వంటి కీలక కార్యక్రమాలకు వెంట తీసుకెళ్తున్నారు. భావి నాయకురాలిగా ఆమెకు ప్రజల్లో, సైన్యంలో గుర్తింపు కల్పించడమే ఈ చర్యల వెనుక ఉద్దేశమని విశ్లేషకులు భావిస్తున్నారు. 1948లో ఉత్తర కొరియా ఏర్పడినప్పటి నుంచి మూడు తరాలుగా కిమ్‌ కుటుంబమే దేశాన్ని పాలిస్తోంది.

కిమ్‌ జు-ఏకు ప్రస్తుతం కల్పిస్తున్న అధికారిక గౌరవ మర్యాదలు చూస్తుంటే ఆమెను వారసురాలిగా ఎంపిక చేసినట్లేనని ఉత్తర కొరియా మాజీ దౌత్యవేత్త తే యోంగ్‌-హో అభిప్రాయపడ్డారు. గతంలో కిమ్‌ జోంగ్‌ ఉన్‌ను వారసుడిగా పరిచయం చేసిన సమయంలోనూ ఇలాంటి ప్రొటోకాల్‌ పాటించారని గుర్తుచేశారు. అధికార వర్కర్స్‌ పార్టీలోని 17 విభాగాలకు ప్రస్తుతం ఒకే ఒక్క మహిళ డైరెక్టర్‌గా ఉన్నారు. ఆమె కిమ్‌ సోదరి కిమ్‌ యో జోంగ్‌. ఇలాంటి పురుషాధిక్య వ్యవస్థలో ఒక బాలికను అత్యున్నత నాయకురాలిగా అంగీకరించడం కొందరికి కష్టంగా ఉందని శరణార్థులు చెబుతున్నారు. అయితే, ఉత్తర కొరియాలో కిమ్‌ కుటుంబానికి దైవసమానమైన స్థానం ఉండటంతో, వారసత్వ ఎంపికలో లింగభేదం పెద్ద అడ్డంకి కాకపోవచ్చని మరికొందరు విశ్లేషిస్తున్నారు.