మంచు దుప్పటిలో కశ్మీర్ పర్వత ప్రాంతాలు

జమ్మూకశ్మీర్‌లోని బందిపొరా జిల్లాలో భారీగా మంచు కురుస్తోంది. ముఖ్యంగా గురేజ్ పర్వత ప్రాంతాలు మంచుతో కప్పుకుపోయి శ్వేతవర్ణంలోకి మారాయి. రాజ్దాన్ పాస్, తులైల్ లోయ పరిసర ప్రాంతాల్లో తాజా మంచు వర్షం కురిసింది. దీంతో రోడ్లపై మంచు పేరుకుపోయి వాహనాల రాకపోకలకు ఇబ్బందులు ఏర్పడుతున్నాయి. రహదారులు జారుడుగా మారడంతో ప్రమాదాలు జరిగే అవకాశం ఉందని అధికారులు ఆందోళన వ్యక్తం చేస్తున్నారు. ప్రస్తుత వాతావరణ పరిస్థితులు మెరుగుపడే వరకు గురేజ్ ప్రాంతాన్ని సందర్శించవద్దని పర్యాటకులకు సూచించారు. ప్రయాణికులు అధికారుల హెచ్చరికలను పాటించాలని, అత్యవసరం కాని ప్రయాణాలకు దూరంగా ఉండాలని కోరారు.

మరోవైపు, కార్గిల్‌లోని మోనామార్గ్, జోజిలా పాస్ ప్రాంతాల్లోనూ మంచు వర్షం కురుస్తోంది. ప్రతికూల వాతావరణ పరిస్థితుల నేపథ్యంలో శ్రీనగర్–లేహ్ జాతీయ రహదారి (NH-1)ను అధికారులు తాత్కాలికంగా మూసివేశారు. ప్రయాణికుల భద్రతను దృష్టిలో ఉంచుకుని ఈ నిర్ణయం తీసుకున్నారు. శ్రీనగర్ నుంచి లేహ్‌కు వెళ్లాలని భావించే వారు ప్రయాణం ప్రారంభించే ముందు రహదారి పరిస్థితులు, అధికారిక ప్రకటనలను తెలుసుకోవాలని సూచించారు. వాతావరణం అనుకూలించి రహదారిపై ప్రయాణం సురక్షితమని నిర్ధారించిన తర్వాతే తిరిగి రాకపోకలకు అనుమతించే అవకాశం ఉంది.