అమెరికా వైఖరి మారే వరకు హోర్ముజ్‌ తెరవం - ఇరాన్‌

అమెరికా తన వైఖరిని మార్చుకునే వరకు హోర్ముజ్‌ జలసంధిని తిరిగి తెరవబోమని ఇరాన్‌ సుప్రీం నేషనల్‌ సెక్యూరిటీ కౌన్సిల్‌ స్పష్టం చేసినట్లు సమాచారం. హోర్ముజ్‌లో నౌకల రాకపోకలకు సంబంధించిన కొత్త డిమాండ్లను కౌన్సిల్‌ వెల్లడించింది. ఈ ప్రాంతంలో నావికా దిగ్బంధనాన్ని ఎత్తివేయడంతో పాటు పర్షియన్‌ గల్ఫ్‌ నుంచి అమెరికా దళాలను ఉపసంహరించుకోవాలని డిమాండ్‌ చేసినట్లు తెలుస్తోంది.

హోర్ముజ్‌ జలసంధి ద్వారా అంతర్జాతీయ నౌకా రవాణా సాగుతున్న నేపథ్యంలో ఇరాన్‌ తాజా డిమాండ్లు కీలకంగా మారాయి. అమెరికా దళాల ఉపసంహరణ, నావికా దిగ్బంధనం తొలగింపు వంటి అంశాలపై స్పష్టత వచ్చే వరకు జలసంధిని తెరవడంపై వెనక్కి తగ్గబోమన్న సంకేతాలను ఇరాన్‌ ఇచ్చినట్లు సమాచారం.