ప్రయాణికుల భద్రతకు ఆర్టీసీ కమాండ్ కంట్రోల్ సెంటర్ ఏర్పాటు

ప్రయాణికుల భద్రత, బస్సుల నిర్వహణను నిరంతరం పర్యవేక్షించేందుకు రాష్ట్ర రోడ్డు రవాణా సంస్థ హైదరాబాద్‌లోని బస్‌భవన్‌లో కమాండ్ కంట్రోల్ సెంటర్‌ను ఏర్పాటు చేసింది. బస్సులు, బస్టాండ్లలో ఉన్న సీసీ కెమెరాలతో పాటు బస్సుల్లో అమర్చిన జీపీఎస్ ట్రాకర్లను ఈ కేంద్రానికి అనుసంధానించారు. దీంతో బస్సుల వేగం, ప్రయాణ మార్గం, సమయపాలనను అధికారులు ఎప్పటికప్పుడు పర్యవేక్షించవచ్చు. డ్రైవర్లు బస్సులను ఎలా నడుపుతున్నారు, డ్రైవింగ్ సమయంలో సెల్‌ఫోన్ ఉపయోగిస్తున్నారా అనే అంశాలపైనా నిఘా ఉంచవచ్చు. ఈ వ్యవస్థ ద్వారా ప్రయాణికుల భద్రతను మరింత మెరుగుపరచడంతో పాటు బస్సుల నిర్వహణను సమర్థంగా చేపట్టేందుకు అవకాశం ఉంటుంది. ప్రస్తుతం ప్రయోగాత్మకంగా కొనసాగుతున్న ఈ కేంద్రం త్వరలో పూర్తిస్థాయిలో అందుబాటులోకి రానుంది. బస్సులో అగ్నిప్రమాదం సంభవించినా, సాంకేతిక సమస్యల కారణంగా మార్గమధ్యంలో బస్సు నిలిచిపోయినా కంట్రోల్ సెంటర్ నుంచి సంబంధిత అధికారులకు వెంటనే సమాచారం అందించవచ్చు. దీంతో సాంకేతిక సిబ్బందిని పంపించడం, ప్రత్యామ్నాయ బస్సులను ఏర్పాటు చేయడం, ప్రయాణికులకు కలిగే ఇబ్బందులను తగ్గించడం సులభమవుతుంది.

బస్సుల్లోని సీసీ కెమెరాలను కంట్రోల్ సెంటర్‌కు అనుసంధానించడం ద్వారా మహిళలు, వృద్ధులు సహా ప్రయాణికుల భద్రతను మెరుగుపరచవచ్చు. అనుమానాస్పద ఘటనలు, చోరీలు, వేధింపులు జరిగినప్పుడు అందుబాటులో ఉన్న దృశ్యాలను పరిశీలించి తగిన చర్యలు తీసుకోవచ్చు. ముఖ్యంగా ఎలక్ట్రిక్ బస్సుల నిర్వహణకు ఈ కేంద్రం మరింత ఉపయోగపడనుంది. ‘పీఎం ఈ-డ్రైవ్‌’ పథకం కింద ఆర్టీసీలో దశలవారీగా మొత్తం 2,200 ఎలక్ట్రిక్ బస్సులను అందుబాటులోకి తీసుకురానున్నారు. ప్రస్తుతం ఆర్టీసీ 1,050 ఈవీ బస్సులను నడుపుతోంది. వీటిలో హైదరాబాద్‌లో 540, జిల్లాల్లో 510 బస్సులు సేవలందిస్తున్నాయి. ఈ బస్సుల్లో తలెత్తే సాంకేతిక లోపాలను కమాండ్ కంట్రోల్ సెంటర్ ద్వారా త్వరగా గుర్తించి మరమ్మతులు చేపట్టవచ్చు. బస్‌భవన్‌లోని కేంద్రం పూర్తిస్థాయిలో పనిచేయడం ప్రారంభించిన తర్వాత బంజారాహిల్స్‌లోని ఇంటిగ్రేటెడ్ కమాండ్ కంట్రోల్ సెంటర్‌తోనూ అనుసంధానం చేయనున్నారు. దీంతో పండుగలు, జాతరలు, భారీ ఊరేగింపుల సమయంలో ట్రాఫిక్ మళ్లింపులు, బస్సుల రాకపోకల క్రమబద్ధీకరణ మరింత సులభమవుతుంది.