ఎల్‌నినో ప్రభావం ఉన్నా విద్యుత్‌ కొరత రాకుండా చర్యలు తీసుకోవాలి - భట్టి విక్రమార్క

ఎల్‌నినో ప్రభావంతో రాష్ట్రంలో విద్యుత్‌ డిమాండ్‌ పెరిగే అవకాశం ఉన్నందున ఎలాంటి కొరత ఏర్పడకుండా ముందస్తు చర్యలు తీసుకోవాలని తెలంగాణ ఉప ముఖ్యమంత్రి భట్టి విక్రమార్క విద్యుత్‌ శాఖ అధికారులను ఆదేశించారు. ‘సూపర్‌ ఎల్‌నినో’ పరిస్థితులు ఎదురైనా విద్యుత్‌ సరఫరాకు అంతరాయం కలగకుండా అవసరమైన ఏర్పాట్లు చేయాలని సూచించారు. వ్యవసాయ, గృహ అవసరాలకు సరిపడా విద్యుత్‌ అందించేందుకు జెన్‌కో థర్మల్‌ విద్యుత్‌ కేంద్రాల్లో రోజుకు 140 మిలియన్‌ యూనిట్ల విద్యుత్‌ ఉత్పత్తి చేయాలని లక్ష్యంగా నిర్దేశించారు. గురువారం రాష్ట్ర సచివాలయంలో విద్యుత్‌ ఉత్పత్తి, సరఫరా, బకాయిలపై ఉన్నతాధికారులతో సమీక్ష నిర్వహించారు. ప్రస్తుతం రోజువారీ థర్మల్‌ విద్యుత్‌ ఉత్పత్తి సగటున 91 మిలియన్‌ యూనిట్లకు చేరిందని, ఈ నెల 16న ఒక్కరోజులో 118 మిలియన్‌ యూనిట్ల విద్యుత్‌ ఉత్పత్తి చేసినట్లు జెన్‌కో సీఎండీ ఎస్‌. హరీశ్‌ వివరించారు. రోజువారీ ఉత్పత్తిని 140 మిలియన్‌ యూనిట్లకు పెంచాలని భట్టి సూచించారు.

యాదాద్రి థర్మల్‌ విద్యుత్‌ కేంద్రంలోని రెండు యూనిట్లకు బొగ్గు సరఫరాలో ఇబ్బందులు తలెత్తకుండా కోల్‌ ఇండియా నుంచి సరఫరా జరిగేలా చర్యలు తీసుకుంటున్నట్లు అధికారులు తెలిపారు. వచ్చే నెల నుంచి బొగ్గు సరఫరా ప్రారంభమయ్యే అవకాశం ఉందన్నారు. ఈ కేంద్రంలోని 800 మెగావాట్ల సామర్థ్యం కలిగిన నాలుగు యూనిట్లు ఇప్పటికే విద్యుత్‌ ఉత్పత్తి చేస్తున్నాయని, ఐదో యూనిట్‌ను ఈ నెల 20న గ్రిడ్‌కు అనుసంధానించినట్లు వివరించారు. మిగిలిన సాంకేతిక, నిర్వహణ సమస్యలను పరిష్కరించి త్వరలోనే పూర్తిస్థాయి వాణిజ్య కార్యకలాపాలు ప్రారంభిస్తామని చెప్పారు. మరోవైపు, మూతపడిన పరిశ్రమల విద్యుత్‌ బకాయిల వసూళ్లకు వన్‌టైమ్‌ సెటిల్‌మెంట్‌ విధానాన్ని ప్రవేశపెట్టాలని భట్టి ఆదేశించారు. అర్హత కలిగిన పరిశ్రమలకు చెల్లింపుల్లో వెసులుబాటు కల్పించడంతో పాటు, పంపిణీ సంస్థలకు దీర్ఘకాలిక బకాయిల వసూళ్లు జరిగేలా సమగ్ర ప్రతిపాదనలు సిద్ధం చేయాలని సూచించారు. సింగరేణి, జెన్‌కో, ట్రాన్స్‌కో సంస్థలకు వివిధ శాఖల నుంచి రావాల్సిన బకాయిలను వసూలు చేసేందుకు చర్యలు చేపట్టాలని ఆర్థిక శాఖ ఉన్నతాధికారులను ఆదేశించారు. ఈ సమావేశంలో ఇంధన శాఖ ప్రత్యేక ప్రధాన కార్యదర్శి నవీన్‌ మిట్టల్‌, ఆర్థిక శాఖ ముఖ్య కార్యదర్శి సందీప్‌ కుమార్‌ సుల్తానియా, సింగరేణి సీఎండీ జ్యోతి బుద్ధ ప్రకాష్‌, జెన్‌కో సీఎండీ హరీశ్‌, ట్రాన్స్‌కో సీఎండీ కృష్ణ భాస్కర్‌, రైతు డిస్కమ్‌ సీఎండీ జితేష్‌ వి.పాటిల్‌, సింగరేణి డైరెక్టర్‌ గౌతం పొట్రు తదితరులు పాల్గొన్నారు.