తొమ్మిదేళ్ల బాలుడి పని చూసి తండ్రికి దిమ్మతిరిగే షాక్

అమెరికాలో ఓ తొమ్మిదేళ్ల బాలుడు తన యూట్యూబ్ ఛానల్‌కు వ్యూస్ రావడం లేదనే ఆందోళనతో తండ్రి క్రెడిట్ కార్డును ఉపయోగించి భారీగా ప్రకటనలు ఇచ్చిన ఘటన వెలుగులోకి వచ్చింది. మైన్‌క్రాఫ్ట్, రాబ్‌లాక్స్ వంటి గేమ్‌ల వీడియోలను బాలుడు తన ఛానల్‌లో అప్‌లోడ్ చేసేవాడు. అయితే ఆశించిన స్థాయిలో వ్యూస్ రాకపోవడంతో బాధపడుతున్నాడు. ఈ క్రమంలో అతడి తండ్రి డేవ్.. ఛానల్ ప్రమోషన్ కోసం యూట్యూబ్‌లో యాడ్ క్యాంపెయిన్ ఎలా నిర్వహించాలో క్రెడిట్ కార్డుతో సహా చూపించాడు.

తండ్రి చూపించిన విధానాన్ని చూసిన బాలుడు వ్యూస్ పెంచుకోవడానికి యాడ్ క్యాంపెయిన్లు నిర్వహించడం ప్రారంభించాడు. ఇలా మూడు వారాల్లో తండ్రి క్రెడిట్ కార్డుతో ఏకంగా రూ.1.13 కోట్లు ప్రకటనల కోసం ఖర్చు చేశాడు. అనంతరం కంపెనీ అధికారులు డేవ్‌ను పిలిచి భారీ క్రెడిట్ కార్డు బిల్లును చూపించడంతో అసలు విషయం బయటపడింది. తన కుమారుడు చేసిన పని అప్పటివరకు తనకు తెలియదని డేవ్ తెలిపారు. కంపెనీ బిల్లు చెల్లించమంటుందో, ఉద్యోగానికి రాజీనామా చేయమంటుందో తెలియని పరిస్థితిలో ఉన్నానని చెప్పారు. బాలుడి యూట్యూబ్ ఛానల్‌ను కొంతకాలం నిలిపివేసే అవకాశం ఉందని కూడా తెలిపారు.