ఏపీలో సాయంత్రం కోర్టులు.. పెండింగ్ కేసుల పరిష్కారానికి కొత్త విధానం!

ఆంధ్రప్రదేశ్‌లో పెండింగ్ కేసుల పరిష్కారానికి న్యాయవ్యవస్థలో కొత్త విధానాన్ని ప్రయోగాత్మకంగా అమలు చేసేందుకు కేంద్ర ప్రభుత్వం సన్నాహాలు చేస్తున్నట్లు కేంద్ర న్యాయశాఖ మంత్రి అర్జున్ రామ్ మేఘ్వాల్ వెల్లడించారు. ఇందులో భాగంగా సాధారణ కోర్టు పనివేళలు ముగిసిన తర్వాత సాయంత్రం 5 గంటల నుంచి రాత్రి 9 గంటల వరకు ప్రత్యేకంగా కేసుల విచారణ చేపట్టే ప్రతిపాదనను పరిశీలిస్తున్నట్లు తెలిపారు. న్యాయస్థానాల్లో పేరుకుపోతున్న కేసుల సంఖ్యను తగ్గించి, ప్రజలకు సత్వర న్యాయం అందించడమే ఈ విధానం ప్రధాన ఉద్దేశం.

ఈ ప్రయోగాత్మక విధానాన్ని ఆంధ్రప్రదేశ్‌తో పాటు బిహార్, ఢిల్లీలోనూ పైలట్ ప్రాజెక్టుగా అమలు చేయాలని యోచిస్తున్నట్లు సమాచారం. ఇందుకోసం పదవీ విరమణ చేసిన న్యాయమూర్తుల సేవలను వినియోగించుకునే అవకాశాలను కూడా పరిశీలిస్తున్నారు. ఈ విధానం అమల్లోకి వస్తే సాధారణ పనివేళల తర్వాత కూడా కేసుల విచారణ కొనసాగి, పెండింగ్ కేసుల పరిష్కారానికి మరింత అవకాశం లభించనుంది. అయితే ఈ ప్రతిపాదన అమలు, విధివిధానాలపై మరిన్ని వివరాలు వెల్లడికావాల్సి ఉంది.