ఈడీ భారీ సోదాలు.. వెలుగులోకి భారీ మనీలాండరింగ్‌ వ్యవహారం

విశాఖపట్నం సబ్‌ జోనల్‌ కార్యాలయం ఆధ్వర్యంలో ఎన్‌ఫోర్స్‌మెంట్‌ డైరెక్టరేట్‌ (ఈడీ) అధికారులు దిల్లీ, కోల్‌కతాలోని ఏడు ప్రాంతాల్లో ఏకకాలంలో సోదాలు నిర్వహించారు. కస్టమైజ్డ్‌ సాఫ్ట్‌వేర్‌ దిగుమతుల పేరుతో నకిలీ పత్రాలు, ఫోర్జరీ ఇన్వాయిస్‌లను ఉపయోగించి విదేశాలకు అక్రమంగా నిధులు తరలించినట్లు ఈడీ గుర్తించింది. వడ్డీ మహేశ్‌, అతడి తండ్రి, మరికొందరు కలిసి కోల్‌కతాలో పలు షెల్‌ కంపెనీలు ఏర్పాటు చేసినట్లు దర్యాప్తులో వెల్లడైంది.

ఈ కంపెనీల ద్వారా సింగపూర్‌, హాంకాంగ్‌, చైనాలోని ఐదు సంస్థలకు రూ.569.03 కోట్లు బదిలీ చేసినట్లు ఈడీ గుర్తించింది. 2014 నుంచి 2017 మధ్య షెల్‌ కంపెనీల బ్యాంకు ఖాతాల ద్వారా ఈ లావాదేవీలు జరిగినట్లు ప్రాథమికంగా నిర్ధారించింది. ఈ కేసులో మొత్తం రూ.1,500 కోట్ల మేర నేరపూరిత ఆర్థిక లావాదేవీలు జరిగి ఉండవచ్చని అంచనా వేస్తోంది. సోదాల్లో రూ.47 లక్షల లెక్కచూపని నగదుతో పాటు 5,900 అమెరికన్‌ డాలర్లు, 2,200 యూఏఈ దిర్హామ్‌లు, 5,600 చైనా కరెన్సీ, కీలక పత్రాలు, ఆస్తి డాక్యుమెంట్లు, డిజిటల్‌ పరికరాలను స్వాధీనం చేసుకుంది.