క్యాన్సర్‌పై అవగాహన పెంచుకోండి.. ప్లాస్టిక్ వాడకం తగ్గించండి: చిరంజీవి

మెగాస్టార్ చిరంజీవి కపిలేశ్వరపురంలో జీఎస్ఎల్‌–సూర్య హెల్త్ కేర్ సెంటర్‌ను ప్రారంభించారు. అనంతరం జరిగిన సభలో ఆరోగ్య పరిరక్షణ, క్యాన్సర్‌పై అవగాహన, ప్లాస్టిక్ వినియోగం వల్ల కలిగే ముప్పులపై మాట్లాడారు. క్యాన్సర్‌ పట్ల భయపడకుండా ముందస్తు పరీక్షలు చేయించుకోవాలని, నివారణ చర్యలకు ప్రాధాన్యం ఇవ్వాలని సూచించారు. పాన్‌ పరాగ్‌, గుట్కా, ధూమపానం వంటి అలవాట్లకు దూరంగా ఉండాలని పేర్కొన్నారు. తన కుటుంబ సభ్యులకు మామోగ్రామ్‌ పరీక్షలు చేయిస్తుంటానని, గర్భాశయ ముఖద్వార క్యాన్సర్‌ నివారణకు అందుబాటులో ఉన్న టీకాలపై అవగాహన పెంచుకోవాలని తెలిపారు.

ప్లాస్టిక్‌ వ్యర్థాలు మానవ ఆరోగ్యానికి ముప్పుగా మారుతున్నాయని చిరంజీవి ఆందోళన వ్యక్తం చేశారు. ప్లాస్టిక్‌ బాటిళ్ల వినియోగాన్ని తగ్గించి, ప్రత్యామ్నాయాలను ప్రోత్సహించాలని సూచించారు. తనపై అభిమానులు చూపిస్తున్న ప్రేమే తనకు ఎనర్జీ ఇస్తుందని చెప్పారు. ఏపీ అభివృద్ధిపై స్పందిస్తూ, గతంతో పోలిస్తే రోడ్ల పరిస్థితిలో మార్పు కనిపిస్తోందని, రాష్ట్రంలో పరిస్థితులు క్రమంగా మెరుగుపడుతున్నాయని వ్యాఖ్యానించారు. ప్రజలకు మేలు జరగాలని, న్యాయం అందాలని ఆకాంక్షించారు. పంచాయతీరాజ్‌ శాఖ ర్యాంకింగ్‌ 23వ స్థానం నుంచి మొదటి స్థానానికి చేరిందని కూడా పేర్కొన్నారు.