ఎల్బీనగర్‌–హయత్‌నగర్‌ డబుల్‌ డెక్కర్‌ కారిడార్‌కు కేంద్రం ఆమోదం

హైదరాబాద్‌–విజయవాడ జాతీయ రహదారిపై ఎల్బీనగర్‌–హయత్‌నగర్‌ డబుల్‌ డెక్కర్‌ ఎలివేటెడ్‌ కారిడార్‌ ప్రాజెక్టుకు కేంద్ర మంత్రి నితిన్‌ గడ్కరీ ఆమోదం తెలిపినట్లు రాష్ట్ర మంత్రి కోమటిరెడ్డి వెంకట్‌రెడ్డి వెల్లడించారు. దిల్లీలో మంగళవారం నితిన్‌ గడ్కరీని కోమటిరెడ్డి వెంకట్‌రెడ్డి, జూపల్లి కృష్ణారావు కలిసి తెలంగాణలో చేపట్టాల్సిన రహదారి ప్రాజెక్టులపై చర్చించారు. ట్రాఫిక్‌ సమస్యలను తగ్గించేందుకు ఎల్బీనగర్‌–హయత్‌నగర్‌ కారిడార్‌ పనులను త్వరగా చేపట్టాలని కోరారు. హైదరాబాద్‌–శ్రీశైలం జాతీయ రహదారి (ఎన్‌హెచ్‌-765)పై ఎలివేటెడ్‌ కారిడార్‌ నిర్మాణానికి కొత్త సమగ్ర ప్రాజెక్టు నివేదిక (డీపీఆర్‌) సిద్ధం చేయాలని విజ్ఞప్తి చేశారు.

రాష్ట్రంలో 34 రహదారి పనులకు కేంద్ర రహదారి మౌలిక సదుపాయాల నిధి (సీఆర్‌ఐఎఫ్‌) నుంచి నిధులు మంజూరు చేయాలని మంత్రులు కోరారు. నవంబరు 19 నుంచి 22 వరకు హైదరాబాద్‌లో జరగనున్న ఇండియన్‌ రోడ్‌ కాంగ్రెస్‌ సమావేశానికి హాజరుకావాలని గడ్కరీని ఆహ్వానించారు. నాగర్‌కర్నూల్‌ జిల్లాలోని సోమశిల వద్ద కృష్ణానదిపై నిర్మించనున్న ఐకానిక్‌ కేబుల్‌ వంతెనకు శంకుస్థాపన కార్యక్రమానికి రావడానికి కేంద్ర మంత్రి అంగీకరించినట్లు కోమటిరెడ్డి తెలిపారు. ఈ సమావేశంలో ఎంపీ మల్లు రవి, రాష్ట్ర ప్రభుత్వ విప్‌ బీర్ల అయిలయ్య పాల్గొన్నారు.