శంషాబాద్ ఎయిర్‌పోర్టులో బుల్లెట్ కలకలం

శంషాబాద్ అంతర్జాతీయ విమానాశ్రయంలో తనిఖీల సందర్భంగా ప్రయాణికుడి వద్ద బుల్లెట్ గుర్తించడం కలకలం రేపింది. శంషాబాద్ నుంచి అబుదాబి వెళ్లేందుకు వచ్చిన ఓ ప్రయాణికుడి వద్ద భద్రతా తనిఖీల్లో బుల్లెట్‌ను అధికారులు గుర్తించారు. దీంతో అప్రమత్తమైన భద్రతా సిబ్బంది ప్రయాణికుడిని అదుపులోకి తీసుకుని, బుల్లెట్‌ను స్వాధీనం చేసుకున్నారు.

అనంతరం ప్రయాణికుడి వద్ద గుర్తించిన బుల్లెట్‌ను తదుపరి విచారణ నిమిత్తం జీఎంఆర్ ఔట్‌పోస్ట్ పోలీసులకు అప్పగించారు. బుల్లెట్ ప్రయాణికుడి వద్దకు ఎలా వచ్చిందనే విషయంపై పోలీసులు విచారణ చేపట్టినట్లు సమాచారం. ఘటనకు సంబంధించిన పూర్తి వివరాలు దర్యాప్తు అనంతరం వెల్లడయ్యే అవకాశం ఉంది.