ప్రపంచంలోని టాప్‌ మ్యూజియంల జాబితాలో బీహార్ మ్యూజియంకు చోటు

పాట్నాలోని బీహార్ మ్యూజియం అంతర్జాతీయ స్థాయిలో అరుదైన గుర్తింపు పొందింది. ‘వర్త్ ఏ జర్నీ’ మ్యాగజైన్ ప్రకటించిన ప్రపంచంలోని 100 ఉత్తమ మ్యూజియంల జాబితాలో తొమ్మిదో స్థానాన్ని దక్కించుకుంది. ఈ ఘనతతో ఆసియా ఖండంలో అగ్రస్థానంలో నిలిచిన ఏకైక భారతీయ మ్యూజియంగా గుర్తింపు పొందింది. పారిస్‌లోని ప్రసిద్ధ లూవ్ర్ మ్యూజియం, న్యూయార్క్‌లోని మెట్ మ్యూజియం వంటి అంతర్జాతీయంగా పేరొందిన మ్యూజియంలను కూడా ఈ జాబితాలో బీహార్ మ్యూజియం అధిగమించింది.

జపాన్‌కు చెందిన ప్రముఖ ఆర్కిటెక్ట్ ఫుమిహికో మాకి ఆధునిక నిర్మాణ శైలిలో ఈ మ్యూజియాన్ని రూపొందించారు. పాట్నాలో 13.9 ఎకరాల విస్తీర్ణంలో దీనిని నిర్మించారు. అద్భుతమైన నిర్మాణ శైలి, ప్రత్యేకతలతో అంతర్జాతీయ గుర్తింపు పొందిన బీహార్ మ్యూజియం.. భారతీయ వారసత్వ సంపదకు మరో ప్రత్యేక గుర్తింపును తీసుకొచ్చింది.