ప్రపంచ దేశాల ప్రతినిధులతో హైదరాబాద్‌లో భారత్ సమ్మిట్‌: భట్టి విక్రమార్క

ప్రపంచవ్యాప్తంగా ప్రజాస్వామ్య విలువలు, రాజకీయ, సామాజిక, ఆర్థిక విధానాలపై అంతర్జాతీయ స్థాయి చర్చలకు హైదరాబాద్ వేదిక కానుంది. తెలంగాణ ప్రభుత్వం ఆధ్వర్యంలో నవంబర్ 13, 14 తేదీల్లో భారత్ సమ్మిట్‌-2 నిర్వహించనున్నారు. దావోస్‌లో ప్రపంచ ఆర్థిక, పెట్టుబడుల విధానాలపై చర్చలు జరిగినట్లుగానే, హైదరాబాద్‌లో జరిగే ఈ సదస్సు ప్రపంచ విధాన చర్చలకు కీలక వేదికగా ఎదగాలని ప్రభుత్వం లక్ష్యంగా పెట్టుకుందని ఉప ముఖ్యమంత్రి భట్టి విక్రమార్క తెలిపారు. ఈ సదస్సులో పాల్గొనేందుకు 70కిపైగా దేశాల నుంచి 1,000 మందికి పైగా ప్రజాప్రతినిధులు, విధాన నిర్ణేతలు, మేధావులు, వివిధ రంగాల ప్రముఖులు అంగీకారం తెలిపారని వెల్లడించారు. ప్రజాస్వామ్య పరిరక్షణ, అహింస, అలీన విధానం ఈ సదస్సు ప్రధాన అజెండాగా ఉంటాయని చెప్పారు.

మహాత్మా గాంధీ ప్రతిపాదించిన అహింసా సిద్ధాంతం, జవహర్‌లాల్ నెహ్రూ అనుసరించిన అలీన విదేశాంగ విధానం, మిశ్రమ ఆర్థిక విధానాలు నేటి ప్రపంచానికి మార్గదర్శకాలని భట్టి విక్రమార్క పేర్కొన్నారు. ప్రజాస్వామ్యంలో అధికార, ప్రతిపక్షాలు రెండు కీలక స్తంభాలని, రాజకీయ ప్రత్యర్థులను శత్రువులుగా చూడటం ప్రజాస్వామ్య స్ఫూర్తికి విరుద్ధమని అన్నారు. ప్రతి పౌరుడి ఓటు హక్కును పరిరక్షించాల్సిన బాధ్యత ప్రభుత్వాలు, ఎన్నికల సంఘంపై ఉందని స్పష్టం చేశారు. ఎస్‌ఐఆర్ ప్రక్రియ పేరుతో అర్హులైన ఓటర్ల హక్కులను తొలగించే ప్రయత్నాలను కాంగ్రెస్ వ్యతిరేకిస్తోందని తెలిపారు. ఈ అంశాలపై చర్చించేందుకు అన్ని రాజకీయ పార్టీలను, నాయకులను భారత్ సమ్మిట్‌కు ఆహ్వానిస్తున్నట్లు వెల్లడించారు.