శబరిమల యాత్రకు ప్రత్యేక రైళ్ల కోసం అయ్యప్ప భక్తుల విజ్ఞప్తి

కార్తీక మాసం ప్రారంభం కావడంతో ఉమ్మడి జిల్లాల్లో అయ్యప్ప భక్తులు మాలధారణ చేసి శబరిమల యాత్రకు సిద్ధమవుతున్నారు. ఏటా ఈ ప్రాంతం నుంచి సుమారు 25 వేల నుంచి 30 వేల మంది వరకు అయ్యప్ప దీక్ష చేపట్టి కేరళలోని శబరిమల క్షేత్రానికి వెళ్తుంటారు. దూర ప్రాంతం కావడంతో చాలామంది రైలు ప్రయాణానికే ప్రాధాన్యం ఇస్తున్నారు. దీక్ష చేపట్టిన భక్తులతో పాటు సాధారణ దుస్తుల్లో వెళ్లే యాత్రికుల సంఖ్య కూడా ఎక్కువగానే ఉంటోంది. అయితే ప్రస్తుతం ఉమ్మడి జిల్లాల మీదుగా శబరిమల యాత్రకు అనుకూలమైన మార్గాల్లో కేవలం మూడు రెగ్యులర్ రైళ్లు మాత్రమే అందుబాటులో ఉన్నాయి. వాటిలో జనవరి వరకు బెర్తులు ఖాళీగా లేవని భక్తులు చెబుతున్నారు. ఇప్పటివరకు రైల్వే శాఖ ప్రత్యేక రైళ్లను ప్రకటించకపోవడంతో అదనపు రైళ్లు ఏర్పాటు చేయాలని అయ్యప్ప భక్తులు విజ్ఞప్తి చేస్తున్నారు.

గతేడాది నడిపించిన ప్రత్యేక రైళ్లను ఈసారి కూడా పునరుద్ధరించాలని భక్తులు కోరుతున్నారు. చర్లపల్లి–కొల్లం ఎక్స్‌ప్రెస్‌ (07113) ప్రతి మంగళవారం సాయంత్రం 6.53 గంటలకు ఆదోనికి చేరుకుని, తిరుగు ప్రయాణంలో గురువారం అదే మార్గంలో వెళ్లేది. భక్తుల విజ్ఞప్తి మేరకు గతేడాది నడిపించిన మచిలీపట్నం–కొల్లం ప్రత్యేక ఎక్స్‌ప్రెస్‌ (07103) రాత్రి 8.35 గంటలకు నంద్యాలకు చేరుకుని, మరుసటి రోజు రాత్రి 10 గంటలకు కొల్లం వెళ్లేది. భక్తులు చెంగన్నూరులో దిగి అక్కడి నుంచి మరో 84 కిలోమీటర్లు రోడ్డు మార్గంలో శబరిమలకు చేరుకునేవారు. నాందేడ్‌–కొల్లం ప్రత్యేక ఎక్స్‌ప్రెస్‌ (07111) కూడా గతేడాది డిసెంబరు, జనవరి నెలల్లో ప్రతి గురువారం కర్నూలుకు రాత్రి 8.25 గంటలకు, డోన్‌కు 10.15 గంటలకు చేరుకునేలా నడిపించారు. ప్రస్తుతం పుణె–కన్యాకుమారి ఎక్స్‌ప్రెస్‌ (16381), కాచిగూడ–మంగళూరు/మురుడేశ్వర్‌ ఎక్స్‌ప్రెస్‌ (12789), కాచిగూడ–కుంటకల్‌ ఎక్స్‌ప్రెస్‌ (12790) మాత్రమే అందుబాటులో ఉన్నాయి. ఈ రైళ్లు కూడా నిర్దిష్ట రోజులు, సమయాల్లోనే నడుస్తుండటంతో యాత్రికులకు ఇబ్బందులు ఎదురవుతున్నాయి. భక్తుల రద్దీని దృష్టిలో ఉంచుకుని ప్రత్యేక రైళ్లు ఏర్పాటు చేయాలని వారు కోరుతున్నారు.