ఏపీ స్థానిక ఎన్నికలపై హైకోర్టులో విచారణ

ఆంధ్రప్రదేశ్‌లో స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ ప్రభుత్వం జారీ చేసిన జీవోపై హైకోర్టులో విచారణ జరిగింది. ఈ అంశానికి సంబంధించిన వ్యాజ్యంలో తనను ఇంప్లీడ్ చేయాలని కోరుతూ రిటైర్డ్ న్యాయమూర్తి, అడ్వొకేట్ వి. ఈశ్వరయ్య అనుబంధ పిటిషన్ దాఖలు చేశారు. సోమవారం జరిగిన విచారణలో ఈశ్వరయ్య స్వయంగా తన వాదనలు వినిపించారు.

ఇంప్లీడ్ పిటిషన్‌పై అభ్యంతరం ఉందని ప్రభుత్వ తరఫు న్యాయవాది కోర్టుకు తెలిపారు. పూర్తి వివరాలతో కౌంటర్ దాఖలు చేస్తామని పేర్కొన్నారు. దీంతో ప్రధాన వ్యాజ్యంతో పాటు ఇంప్లీడ్ పిటిషన్‌పైనా కౌంటర్ దాఖలు చేయాలని హైకోర్టు ప్రభుత్వాన్ని ఆదేశించింది. తదుపరి విచారణను అక్టోబర్ 1కి వాయిదా వేసింది. కాగా, 34 శాతం బీసీ రిజర్వేషన్లపై దాఖలైన మరో పిటిషన్‌లో హైకోర్టు ఇప్పటికే తీర్పును రిజర్వ్ చేసింది.