అన్నా యూనివర్సిటీ పరిధిలో షాకింగ్ ఫలితాలు..

అన్నా యూనివర్సిటీ పరీక్షల ఫలితాలపై నిర్వహించిన విశ్లేషణలో తమిళనాడులోని 24 ఇంజినీరింగ్‌ కాలేజీల విద్యా ప్రమాణాలపై ఆందోళన వ్యక్తమవుతోంది. 2021 నవంబర్‌–డిసెంబరు నుంచి 2025 నవంబర్‌–డిసెంబరు వరకు ఈ కాలేజీలకు చెందిన 2,425 మంది విద్యార్థులు వివిధ సెమిస్టర్‌ పరీక్షలకు హాజరయ్యారు. అయితే వారిలో ఒక్క విద్యార్థి కూడా ఒక్క సబ్జెక్టులోనూ ఉత్తీర్ణత సాధించలేదని యూనివర్సిటీ డేటా ఆధారంగా వెల్లడైంది.

తక్కువ విద్యార్థి చేరికలు ఉన్న కాలేజీలపైనా ఈ అంశం దృష్టిని ఆకర్షించింది. తమిళనాడులో 418 ఇంజినీరింగ్‌ కాలేజీల్లో 2,53,806 సీట్ల సామర్థ్యం ఉండగా, 2026 కౌన్సెలింగ్‌లో సుమారు 1,99,775 సీట్లు భర్తీ అయ్యాయి. కేవలం 35 కాలేజీల్లోనే 100 శాతం సీట్లు నిండగా, 24 కాలేజీల్లో చేరికలు 10 శాతానికి లోపే ఉన్నాయి. వీటిలో 15 కాలేజీల్లో సింగిల్‌ డిజిట్‌ సంఖ్యలోనే అడ్మిషన్లు జరిగాయి. తక్కువ ఫలితాలు, తక్కువ చేరికలు ఉన్న సంస్థలను సమీక్షించాలని విద్యావేత్తలు కోరుతున్నారు. సంబంధిత డేటాను పరిశీలించి తగిన చర్యలు తీసుకుంటామని అన్నా యూనివర్సిటీ రిజిస్ట్రార్‌ ప్రొఫెసర్‌ డా. వి. కుమరేశన్‌ తెలిపారు.