పాకిస్థాన్‌లో ఐసిస్ స్థావరాలపై అఫ్గానిస్థాన్ డ్రోన్ దాడులు

పాకిస్థాన్‌లోని ఐసిస్ స్థావరాలపై అఫ్గానిస్థాన్ డ్రోన్ దాడులు జరిపింది. బలోచిస్థాన్‌లోని పిషిన్ జిల్లా సరనాన్ ప్రాంతంలో ఉన్న ఐసిస్ జాయింట్ సెంటర్‌తో పాటు ఇతర ప్రాంతాలను లక్ష్యంగా చేసుకున్నట్లు తెలిపింది. తూర్పు అఫ్గాన్‌పై పాకిస్థాన్ చేసిన దాడులకు ప్రతీకారంగానే ఈ చర్యలు చేపట్టినట్లు అఫ్గాన్ అధికారులు వెల్లడించారు. ఈ దాడుల్లో పలువురు ఐసిస్ సభ్యులు మరణించినట్లు పేర్కొన్నారు.

ఇదిలా ఉండగా, అఫ్గాన్ నుంచి వచ్చిన నాలుగు డ్రోన్‌లను తమ సైన్యం అడ్డుకున్నట్లు పాక్ వెల్లడించింది. సరనాన్‌లోని ఓ పాఠశాల సమీపంలో డ్రోన్ శకలాలు లభ్యమయ్యాయని తెలిపింది. ఇలాంటి చర్యలు కొనసాగితే తీవ్ర పరిణామాలు తప్పవని తాలిబన్లను హెచ్చరించింది. ఐసిస్ పాక్ భూభాగాన్ని వాడుకుంటోందన్న అఫ్గాన్ ఆరోపణలను పాక్ ఖండించింది.