విశాఖ నేవీ డాక్‌యార్డ్‌లో ప్రమాదం

విశాఖపట్నంలోని నేవీ డాక్‌యార్డ్‌లో యుద్ధనౌక ఐఎన్‌ఎస్‌ కేసరి ప్రమాదానికి గురైంది. నౌక ముందుభాగం కొంత మేర నీటిలో మునిగిపోవడంతో అధికారులు వెంటనే అప్రమత్తమయ్యారు. రక్షణ, సహాయక చర్యలు చేపట్టి నౌకలో ఉన్న సిబ్బందిని సురక్షితంగా బయటకు తీసుకొచ్చారు. ఈ ఘటనలో నేవీ సిబ్బందికి ఎలాంటి ప్రమాదం జరగలేదని సమాచారం.

ఇటీవలే ఐఎన్‌ఎస్‌ కేసరి మరమ్మతులు పూర్తయ్యాయి. మరికొద్ది రోజుల్లో తిరిగి సముద్ర ప్రయాణానికి సిద్ధమవుతున్న సమయంలో ఈ ఘటన చోటుచేసుకుంది. నౌక ముందుభాగం నీటిలోకి ఎందుకు మునిగిందనే విషయంపై అధికారులు దృష్టి సారించారు. ప్రమాదానికి గల కారణాలు, నౌకకు జరిగిన నష్టంపై వివరాలు తెలియాల్సి ఉంది.