సిద్ధరామయ్య స్టింగ్ ఆపరేషన్‌ కేసులో కొత్త ట్విస్ట్

మాజీ ముఖ్యమంత్రి సిద్ధరామయ్యను లక్ష్యంగా చేసుకుని జరిగినట్లు ఆరోపణలు ఎదుర్కొంటున్న స్టింగ్ ఆపరేషన్ వ్యవహారం కర్ణాటక రాజకీయాల్లో మరోసారి చర్చనీయాంశంగా మారింది. వైరల్ వీడియోలో చేసిన ఆరోపణలు కల్పితమైనవని బెంగళూరు పోలీసులు ప్రాథమికంగా వెల్లడించడంతో ఈ వివాదం ముగిసిపోతుందని చాలామంది భావించారు. అయితే, తాజాగా ఈ కేసు దర్యాప్తులో కేంద్ర మంత్రి హెచ్‌డీ కుమారస్వామి పేరు తెరపైకి వచ్చింది. వీడియోను అప్‌లోడ్ చేసేందుకు ఉపయోగించినట్లు అనుమానిస్తున్న మొబైల్ ఫోన్‌ను దిల్లీలోని కుమారస్వామి అధికారిక నివాసంలో మరో వ్యక్తికి అప్పగించినట్లు నిందితుడు రితేష్ పాండే తన వాంగ్మూలంలో పేర్కొన్నాడని బెంగళూరు పోలీస్ కమిషనర్ సీమంత్ కుమార్ సింగ్ తెలిపారు. అయితే ఈ వాంగ్మూలంలోని అంశాలను పోలీసులు ఇంకా ధ్రువీకరిస్తున్నారు.

పోలీసుల వివరాల ప్రకారం, ప్రజ్వల్ ప్రసాద్ సూచనల మేరకు రితేష్ పాండే, వినోద్ శర్మ ఢిల్లీలోని కరోల్ బాగ్‌లో మొబైల్ ఫోన్ కొనుగోలు చేసి, అనంతరం కుమారస్వామి నివాసంలో ప్రజ్వల్ ప్రసాద్‌కు అప్పగించినట్లు ఆరోపణలు ఉన్నాయి. ఈ వ్యవహారంలో నిజానిజాలు తేల్చేందుకు పోలీసులు సీసీటీవీ ఫుటేజీ, డిజిటల్ ఆధారాలు, ఆర్థిక లావాదేవీలను పరిశీలిస్తున్నారు. ప్రజ్వల్ ప్రసాద్, వినోద్ శర్మలకు నోటీసులు కూడా జారీ చేసినట్లు సమాచారం. అయితే, ఈ స్టింగ్ ఆపరేషన్‌లో కుమారస్వామి ప్రత్యక్ష పాత్ర ఉన్నట్లు ఇప్పటివరకు నిర్ధారణ కాలేదని, విచారణ పూర్తయ్యే వరకు ఎలాంటి తుది నిర్ణయానికి రాలేమని పోలీస్ కమిషనర్ స్పష్టం చేశారు. పోలీసుల ఆరోపణలను కుమారస్వామి ఖండించారు.