ఐఫోన్ 17కు ఊహించని డిమాండ్

కొత్త ఐఫోన్ 18 సిరీస్ విడుదలకు ఇంకా కొన్ని వారాల సమయం ఉండగానే, ప్రస్తుతం మార్కెట్లో ఉన్న ఐఫోన్ 17 సిరీస్‌కు ఊహించని స్థాయిలో డిమాండ్ పెరిగింది. సాధారణంగా కొత్త ఐఫోన్ విడుదలైన తర్వాత పాత మోడళ్ల ధరలు తగ్గి అమ్మకాలు పెరుగుతాయి. అయితే ఈసారి అందుకు భిన్నంగా, విడుదలకు ముందే ఐఫోన్ 17 మోడళ్లు ఆన్‌లైన్, ఆఫ్‌లైన్ స్టోర్లలో వేగంగా అమ్ముడై ఔట్ ఆఫ్ స్టాక్ అవుతున్నాయి.

ఈ అనూహ్య డిమాండ్‌కు ప్రధాన కారణంగా యాపిల్ సీఈఓ టిమ్ కుక్ చేసిన తాజా వ్యాఖ్యలను టెక్ నిపుణులు చెబుతున్నారు. మెమొరీ చిప్‌ల ధరలు పెరగడంతో ఉత్పత్తి వ్యయం అధికమైందని, భవిష్యత్తులో కొన్ని ఉత్పత్తుల ధరలను పెంచాల్సి రావచ్చని ఆయన తెలిపారు. ఇప్పటికే ఐప్యాడ్‌లు, మ్యాక్‌బుక్‌లు, మ్యాక్ కంప్యూటర్ల ధరలను యాపిల్ పెంచగా, ప్రస్తుతం ఐఫోన్ ధరల్లో మాత్రం మార్పు చేయలేదు.

త్వరలో ఐఫోన్‌ల ధరలు కూడా పెరగొచ్చనే అంచనాతో వినియోగదారులు ఇప్పుడే ఐఫోన్ 17 కొనుగోలు చేయడానికి ఆసక్తి చూపుతున్నారు. దీంతో అమెజాన్, ఫ్లిప్‌కార్ట్ వంటి ఈ కామర్స్ ప్లాట్‌ఫారమ్‌లతో పాటు దేశవ్యాప్తంగా అనేక యాపిల్ రిటైల్ స్టోర్లలో కూడా స్టాక్ వేగంగా ఖాళీ అయింది. కొత్త స్టాక్ కోసం కొనుగోలుదారులు ఎదురుచూస్తున్నారు.