ఈపీఎఫ్ చెల్లింపులకు కొత్త సౌకర్యం

ప్రైవేట్ రంగంలోని ప్రముఖ ఫెడరల్ బ్యాంక్ ఖాతాదారులకు కొత్త డిజిటల్ సౌకర్యాన్ని అందుబాటులోకి తీసుకొచ్చింది. ఇకపై ఖాతాదారులు నేరుగా అంతర్జాల బ్యాంకింగ్ ద్వారా ఉద్యోగుల భవిష్య నిధి సంబంధిత చెల్లింపులను సులభంగా చేయవచ్చు. ఇందుకోసం బ్యాంకు తన డిజిటల్ వేదికను ఉద్యోగుల భవిష్య నిధి సంస్థతో అనుసంధానం చేసినట్లు వెల్లడించింది.

ఈ సేవల ద్వారా వ్యాపార సంస్థలు, కంపెనీలు కార్యాలయాలకు వెళ్లాల్సిన అవసరం లేకుండా ఆన్‌లైన్ ద్వారానే ఈపీఎఫ్ బకాయిలను చెల్లించవచ్చు. ఇప్పటికే భారతీయ స్టేట్ బ్యాంక్, హెచ్‌డీఎఫ్‌సీ బ్యాంక్, ఐసీఐసీఐ బ్యాంక్, యాక్సిస్ బ్యాంకులు ఈ సేవలను అందిస్తుండగా, ఇప్పుడు ఫెడరల్ బ్యాంక్ కూడా ఈ జాబితాలో చేరింది. ప్రభుత్వ సేవలను బ్యాంకింగ్ వ్యవస్థలతో అనుసంధానం చేయడం వల్ల వినియోగదారులకు మరింత సౌకర్యవంతమైన డిజిటల్ సేవలు అందుతాయని బ్యాంక్ కార్యనిర్వాహక సంచాలకుడు హర్ష్ దుగార్ తెలిపారు.