బడ్జెట్ మ్యాక్‌బుక్ నియోను ఆపిల్ ఆవిష్కరించింది

అమెరికా టెక్ దిగ్గజ సంస్థ యాపిల్ బుధవారం అత్యంత అందుబాటు ధరలో మ్యాక్‌బుక్ నియో ల్యాప్‌టాప్‌ను ఆవిష్కరించింది. ఇది గూగుల్ క్రోమ్‌బుక్‌లకు పోటీగా నిలుస్తుందని భావిస్తున్నారు. మ్యాక్‌బుక్ ఎయిర్, మ్యాక్‌బుక్ ప్రో మోడళ్లకు భిన్నంగా, ఈ మ్యాక్‌బుక్ నియో ఐఫోన్‌లలో ఉపయోగించే క్లాస్-ఎ సిరీస్ చిప్ ఆధారంగా పనిచేయడం విశేషం. తక్కువ ధర వినియోగదారులను ఆకర్షించడమే లక్ష్యంగా యాపిల్ ఈ కొత్త మోడల్‌ను తీసుకొచ్చింది.

ఇప్పటివరకు యాపిల్ మ్యాక్‌బుక్‌లు 999 డాలర్ల నుంచి ప్రారంభమవుతుండగా, మ్యాక్‌బుక్ నియో ధర 599 డాలర్ల నుంచే అందుబాటులోకి రానుంది. ఫుల్ మ్యాక్ ఓఎస్ ఆపరేటింగ్ సిస్టమ్, 13 అంగుళాల డిస్‌ప్లే, కనీసం 256GB స్టోరేజ్, 16 గంటల వరకు బ్యాటరీ లైఫ్ వంటి ఫీచర్లతో ఈ ల్యాప్‌టాప్ లభిస్తుంది. ఈ నెల 11 నుంచి డెలివరీలు ప్రారంభం కానున్నాయి.