ఏఐ యుగంలో మనుషుల గుర్తింపునకు ఐరిస్ స్కానింగ్ టెక్నాలజీ

ఓపెన్‌ఏఐ సీఈఓ సామ్ ఆల్ట్‌మన్ సహ వ్యవస్థాపకుడిగా ఉన్న బయోమెట్రిక్ వెరిఫికేషన్ స్టార్టప్ వరల్డ్, తన గుర్తింపు ధ్రువీకరణ సేవలను మరింత విస్తరిస్తోంది. ఇందులో భాగంగా జూమ్‌తో పాటు పలు ఆర్థిక సంస్థలతో భాగస్వామ్యాలు కుదుర్చుకుంది. ఈ సంస్థ అభివృద్ధి చేసిన ‘ఆర్బ్’ అనే గోళాకార పరికరం ద్వారా వ్యక్తుల కంటి కనుపాపలను స్కాన్ చేసి, ఎన్‌క్రిప్ట్ చేసిన గుర్తింపు రికార్డును రూపొందిస్తారు. ‘వరల్డ్ ఐడీ’ వ్యవస్థ ద్వారా నిజమైన వ్యక్తులను బాట్లు, ఏఐ ఆధారిత నకిలీ గుర్తింపుల నుంచి వేరు చేయడం సంస్థ లక్ష్యం. జూమ్‌లో ఈ సేవను ఉపయోగించే ధ్రువీకరించిన వ్యక్తుల పేర్ల పక్కన నీలిరంగు బ్యాడ్జ్ కనిపిస్తుంది. ముఖ్యంగా రహస్య సమాచారం చర్చించే సమావేశాలు, కీలకమైన ఆన్‌లైన్ సంభాషణల్లో పాల్గొనేవారి గుర్తింపును నిర్ధారించేందుకు ఈ విధానం ఉపయోగపడుతుందని సంస్థ చెబుతోంది.

మరోవైపు, ఏఐ ఏజెంట్లను గుర్తించేందుకు ‘వరల్డ్ ఐడీ ఫర్ ఏజెంట్స్’ సేవను అందుబాటులోకి తీసుకురావడానికి బైన్ క్యాపిటల్, ఓపెన్‌ఎక్స్ఛేంజ్, అవుట్‌టేక్, పాంటెరా క్యాపిటల్, వాన్‌ఎక్ ఫండ్స్ వంటి సంస్థలతోనూ వరల్డ్ భాగస్వామ్యం కుదుర్చుకుంది. వినియోగదారుల తరఫున పనులు చేసే ఏఐ ఏజెంట్లను గుర్తించి, వాటికి అనుమతి ఇచ్చిన వ్యక్తులతో సంబంధాన్ని నిర్ధారించడం ఈ సేవ ఉద్దేశం. ప్రభుత్వ గుర్తింపు పత్రాలు, సెల్ఫీలు, ఆర్బ్ ద్వారా ఐరిస్ స్కానింగ్ వంటి పద్ధతులతో ధ్రువీకరణ చేసే అవకాశాలు కూడా ఉన్నాయి. తన వ్యవస్థ వినియోగదారుల గోప్యతను కాపాడేలా రూపొందించామని వరల్డ్ చెబుతున్నప్పటికీ, బయోమెట్రిక్ సమాచార భద్రతపై ఆందోళనలు కొనసాగుతున్నాయి. ఏఐ ఏజెంట్లు, డీప్‌ఫేక్ మోసాలు పెరుగుతున్న నేపథ్యంలో ఆన్‌లైన్‌లో నిజమైన వ్యక్తులను గుర్తించే సాంకేతికతకు ప్రాధాన్యం పెరుగుతోంది.