వైద్య రంగంలో ఏఐ బూస్ట్‌..

దేశీయ వైద్య సేవల్లో కృత్రిమ మేధ (ఏఐ) వినియోగం వేగంగా పెరుగుతోంది. ఏఐ సాయంతో ఆరోగ్య సంరక్షణ నిపుణులు ఎక్కువ మంది రోగులకు సేవలు అందించగలుగుతున్నారని ఫిలిప్స్‌ ఫ్యూచర్‌ హెల్త్‌ ఇండెక్స్‌ 2026 నివేదిక వెల్లడించింది. ప్రపంచవ్యాప్తంగా 50% మంది ఆరోగ్య సంరక్షణ నిపుణులు ఏఐ తమ సామర్థ్యాన్ని పెంచిందని చెప్పగా, భారత్‌లో ఈ సంఖ్య 71%గా ఉంది. ప్రస్తుత ఆరోగ్య సంరక్షణ వనరులను మరింత సమర్థంగా వినియోగించుకోవడంలో ఏఐ కీలకంగా మారుతోందని నివేదిక పేర్కొంది. రోగుల ఆరోగ్య పరిస్థితులు మెరుగుపడేందుకు ఏఐ ఉపకరిస్తుందని భారత్‌లోని 85% మంది ఆరోగ్య సంరక్షణ నిపుణులు విశ్వసిస్తున్నారు.

వైద్య సేవల నాణ్యత, రోగుల భద్రతను మెరుగుపరచడంలోనూ ఏఐ కీలక పాత్ర పోషిస్తోంది. గత మూడు నెలల్లో కనీసం మూడు సార్లు వైద్యపరమైన పొరపాటును గుర్తించడానికి లేదా నివారించడానికి ఏఐ సాయపడిందని 48% మంది భారత ఆరోగ్య సంరక్షణ నిపుణులు తెలిపారు. ఏఐ కారణంగా వైద్యులు వారానికి సగటున 10 మంది అదనపు రోగులను చూడగలుగుతున్నారు. గ్రామీణ ప్రాంతాల్లో నాణ్యమైన వైద్య సేవలను అందించడంలో ఏఐ సహాయపడగలదని 80% మంది నిపుణులు విశ్వసిస్తున్నారని ఫిలిప్స్‌ భారత ఉపఖండ ఎండీ భరత్‌ సెషా తెలిపారు. వైద్యులతో గడిపే సమయాన్ని మరింత సమర్థంగా వినియోగించుకోవడానికి జనరేటివ్‌ ఏఐ సహాయపడిందని 68% మంది తెలిపారు. 10 దేశాలకు చెందిన 2,000 మందికి పైగా ఆరోగ్య సంరక్షణ నిపుణులు, 20,000 మందికి పైగా రోగుల అభిప్రాయాలతో ఈ నివేదిక రూపొందించారు. ఇందులో భారత్‌కు చెందిన 200 మంది ఆరోగ్య నిపుణులు, 2,000 మందికి పైగా రోగులు పాల్గొన్నారు.